މިހާރު ކުރިއަށްދާ ކޮފީ ވިތު ކަރަން ސީޒަން 8ގެ އެންމެ ފަހުގެ އެޕިސޯޑު ޒުވާން ދެ އެކްޓަރުން ކަމަށްވާ އަދިތުޔާ ރޯއީ ކަޕޫރުއާއި އަރްޖުން ކަޕޫރުއާއެކު ނެރެފި އެވެ.

ޑައިރެކްޓަރު ކަރަން ޖޯހަރުގެ ޓޯކް ޝޯގެ ކުރީގެ ސީޒަންތަކުގައި އެ ދެތަރިން ފެނުނު ނަމަވެސް އެކުގައި މިހާތަނަށް ފެނިފައެއް ނުވެ އެވެ.

އަދިތުޔާއާއި އަރްޖުންގެ އެޕިސޯޑު މިހާރު ޑިޒްނީ ޕްލަސްއިން ދައްކަމުން އަންނައިރު އެ ޝޯގެ ތެރެއިން އެ ދެމީހުން ވަނީ އެމީހުންގެ ފިލްމީ މަސައްކަތްތަކާ ޒާތީ ދިރިއުޅުމާ ބެހޭ ގޮތުން ވާހަކަ ދައްކާފަ އެވެ.

އެގޮތުން މިހާރު މީޑިއާގައި ދެކެވެމުން އަންނަ އަދިތުޔާއާއި އަނަންޔާ ޕާންޑޭގެ ލޯބީގެ ވާހަކައާ ބެހޭ ގޮތުން ވެސް ކަރަން އަދިތުޔާއާ ސުވާލު ކުރި އެވެ.

އެ ސުވާލަށް އަދިތުޔާ ސީދާ ޖަވާބެއް ދީފައި ނުވާއިރު މަޖާ ގޮތަކަށް ސުވާލުގެ މިސްރާބު އޭނާ އޮޅުވާލި އެވެ. އެހެން ކަމުން އެ ވާހަކަ ތަކުގައި ތެދެއް ވާ ކަމަށް މީހުން އަންނަނީ ބުނަމުންނެވެ.