ކަރީނާ ކަޕޫރު ޚާންއަކީ އަހަރުމެންގެ ތެރެއިން އެއްވެސް މީހަކަށް އާ ނަމަކަށް ނުވެދާނެ އެވެ. އެއީ ބޮލީވުޑްގައި މިވަގުތު އެންމެ ފުންނާބު އުސް އެއް އަންހެން ތަރި އެވެ. އެހެން ނަމަވެސް "ބޭބޯ" އޭ ބުނެފިނަމަ އެއީ ކަރީނާކަން އެނގޭ މީހުން ނިސްބަތުން މަދުވާނެ އެވެ.

ކަރީނާ އަށް ލޯބިން ބޭބޯ ކިޔަން ނިންމީ އޭނާގެ ބައްޕަ ރަންދީރް ކަޕޫރެވެ. ސަބަބަކީ ކަރީނާގެ ދައްތަ ކަރިޝްމާއަށް ލޯބިން ލޯލޯ ކިޔާތީ އެ ނަމާ ގުޅުވައިގެން ނަމެއް ކިޔުމުގެ ބޭނުމުގަ އެވެ.

މީގެ ކުރިން އިންޑިއާގެ މީޑިއާއަކަށް ދިން އިންޓަވިއުއެއްގައި ކަރީނާ ބުނީ އޭނާގެ މައިންބަފައިން ބޭނުންވީ ދެ ދަރިންނަށް ވެސް މަޖާ ނަންތަކެއް ކިޔުމަށެވެ. ލޯލޯ އާއި ބޭބޯ މި ނަން އުފެދިގެން އައި ގޮތަކީ އެއީ އެވެ.

އެހެން ކަމުން ބޮލީވުޑްގައި މަދުން ނަމަވެސް ކަރީނާއަށް "ބޭބޯ"ގެ ނަމުން މުހާތަބު ކުރެވެ އެވެ. އެހެން ނަމަވެސް އެއީ އާއްމުކޮށް އާއިލާ ތެރޭގައި އޭނާއަށް ކިޔާއުޅޭ ނަމެކެވެ.

މީޑިއާތަކުން ރިޕޯޓުކުރި ގޮތުގައި ރާޖް ކަޕޫރު އޭނާގެ ކާފަ ދަރިންނަށް ކިޔަން ނިންމީ ރިދިމާ އާއި ސިދިމާ އެވެ. ރިޝީއާއި ނީތޫ އެމީހުންގެ ދަރިފުޅަށް ރިދީމާ ކީ ނަމަވެސް ރަންދީރުއާއި ބަބީތާ އެމީހުންގެ ދަރިފުޅަށް ކީ ކަރީނާ އެވެ.