މަޝްހޫރު ބޮލީވުޑް އެކްޓްރެސް ޕްރިތީ ޒިންތާގެ ނަމާ ބެހޭ ގޮތުން މިފަހަކަށް އައިސް އިންޓަނެޓުގައި ވަރަށް ގިނައިން ވާހަކަ ދެކެވެ އެވެ. ޕްރިތީގެ ވިކިޕީޑިއާ ޕޭޖުގައި ވެސް އޭނާގެ އަސްލު ނަމަކަށް "ޕްރީތަމް ސިންހް" ޖަހާފައިވެ އެވެ.

އެންމެ ފަހުން ޕްރިތީ މިވަނީ އޭނާގެ ނަމާ ބެހޭ ގޮތުން އަޅާފައިވާ އޮޅުންތައް ފިލުވައިދީފަ އެވެ. ޕްރިތީ ވަނީ އިންސްޓަގްރާމްގައި މިކަމާ ބެހޭ ގޮތުން ވީޑިއޯއެއް ހިއްސާކޮށްފަ އެވެ.

އެ ވީޑިއޯގައި ޕްރިތީ ބުނީ ޕްރީތަމް ސިންހްއަކީ ދުވަހަކު ވެސް އޭނާގެ އަސްލު ނަން ނޫން ކަމަށާއި އިންޓަނެޓަށް އެ ނަން އައީ ކިހިނެއް ކަމެއް ހުދު އޭނާއަށް ވެސް ނޭނގޭ ކަމަށެވެ.

އެއާއެކު ޕްރިތީ ވަނީ ކައިވެންޏަށް ފަހު އޭނާގެ ނަމަށް އިތުރު "ޖީ" އަކުރެއް އިތުރު ކޮށްފައިވާނެ ކަމަށާއި އެހެން ކަމުން މިހާރު އޭނާގެ ނަމަކީ "ޕްރިތީ ޖީ ޒިންތާ" ކަމަށް ވެސް ބުނެފަ އެވެ.

ޕްރިތީއަކީ 1990 އާއި 2000ގެ ކުރީކޮޅުގެ އަހަރުތަކުގައި ބޮލީވުޑްގެ މަޝްހޫރު ފިލްމުތަކަކުން ފެނުނު ތަރި އެކެވެ. އެހެން ނަމަވެސް ކައިވެންޏަށްފަހު އޭނާ ވަނީ މި ދާއިރާއާ ކޮންމެވެސް ވަރަކަށް ދުރަށް ޖެހިފަ އެވެ.