1960އާއި 70ގެ އަހަރުތަކުގައި ބޮލީވުޑްގެ ގިނަ ފިލްމުތަކަކުން އާއްމުންގެ މަގުބޫލުކަން ހޯދި ތަނޫޖާގެ ސިއްހީ ހާލު ގޯސްވެ ހޮސްޕިޓަލުގައި އެނދުމަތި ކޮށްފި އެވެ.

އިންޑިއާގެ ހަބަރުތައް ބުނާ ގޮތުގައި މިދިޔަ އާދީއްތަ ދުވަހުގެ ހަވީރު ތަނޫޖާ ހޮސްޕިޓަލަށް ގެންދެވުނީ މުސްކުޅި ބަލީގައި ހާލު ދެރަވުމުންނެވެ.

އުމުރުން 80 އަހަރުގެ ތަނޫޖާ އާއްމުކޮށް ބޭރު ތެރެއިން ފެންނައިރު މިފަހަކާ ޖެހެންދެން ވެސް އޭނާގެ ސިއްހަތު ރަނގަޅުކޮށް ހުރިކަން ފާހަގަކޮށްލެވެ އެވެ.

ހަބަރުތައް ބުނާ ގޮތުގައި މިވަގުތު ތަނޫޖާއަށް ފަރުވާ ދެމުން އަންނަނީ މުމްބާއީގެ ހޮސްޕިޓަލެއްގެ އައިސީޔޫގަ އެވެ. އެހެން ނަމަވެސް އޭނާގެ ހާލު ރަނގަޅުވަމުން އަންނަކަމަށް ބުނެވެ އެވެ.

ތަނޫޖާ ބޮލީވުޑަށް އެންމެ ފުރަތަމަ ނުކުތީ 1950 ވަނަ އަހަރު ނުކުތް އޭނާގެ ދައްތަ ނޫތަންގެ ފިލްމު "ހަމާރީ ބޭޓީ"އިންނެވެ. އޭގެ ފަހުން "ޖުވެލް ތީފް"، "ހާތީ މެރޭ ސާތީ"، އަދި "މެރޭ ޖީވަން ސާތީ" ފަދަ ފިލްމުތަކުން އޭނާ ފެނިގެން ދިޔަ އެވެ.

ތަނޫޖާއަކީ ބޮލީވުޑްގައި 1990 ގެ އަހަރުތަކުން ފެށިގެން މަޝްހޫރުވި އެކްޓަރުންތަކެއް ކަމަށްވާ ކާޖޮލްއާއި އޭނާގެ ކޮއްކޮ ތަނީޝާ މުކަރްޖީގެ މަންމަ އެވެ.