ގާތްގަނޑަކަށް 8 އަހަރަށްފަހު ބޮލީވުޑްގެ އެކްޓްރުން ކަމަށްވާ ކާޖޮލްއާއި ކްރިތީ ސެނަން އެކުގައި ފެންނަ ފިލްމު "ދޯ ޕައްޓީ"ގެ ޝޫޓިން ނިންމާލައިފި އެވެ.

މީގެ ދެ ދުވަސް ކުރިން ފިލްމުގެ ޝޫޓިންގެ މަސައްކަތް ނިމުނުއިރު ދެން ކުރިއަށްދާނީ ފިލްމުގެ ޕޯސްޓް ޕްރޮޑަކްޝަން މަސައްކަތްތަކެވެ.

އަންނަ އަހަރު ނެޓްފްލިކްސްގައި ރިލީޒް ކުރަން ހަމަޖެހިފައިވާ "ދޯ ޕައްޓީ"އަކީ ކްރިތީގެ އަމިއްލަ ޕްރޮޑަކްޝަން ހައުސް ބަޓާފްލައި ޕްރޮޑަކްޝަންސްގެ ފުރަތަމަ އުފެއްދުމެވެ.

ފިލްމާ ބެހޭ ގޮތުން ވާހަކަ ދައްކަމުން ކްރިތީ ބުނީ އެ ފިލްމަކީ އޭނާއަށް ވަރަށް ހާއްސަ ފިލްމެއް ކަމަށާއި ފިލްމުގެ ވާހަކައަކީ ވެސް ތަފާތު ވާހަކައެއް ކަމަށެވެ.

ކާޖޮލްއާއި ކްރިތީ އެންމެ ފަހުން އެކުގައި ފެނިގެންދިޔައީ 2015 ވަނަ އަހަރު ނުކުތް "ދިލްވާލޭ"އިންނެވެ. އެ ދެތަރިންގެ އިތުރުން ޝާހްރުކް ޚާންއާއި ވަރުން ދަވަން ފެނިގެންދާ އެ ފިލްމަށް ލިބުނީ ފިނި ތަރުހީބެކެވެ.