ބޮލީވުޑްގެ އެކްޓަރެއް ކަމަށްވާ އަރްބާޒް ޚާންއާއި މިފަހުން އޭނާ ލޯބީގެ ގޮތުން ގުޅިގެން އުޅުނު މޭކަޕް އާޓިސްޓް ޝުރާ ޚާން ކައިވެނި ކޮށްފި އެވެ.

އަރްބާޒްއާއި ޝުރާ ކައިވެނި ކޮށްފައިވަނީ މިދިޔަ އާދީއްތަ ދުވަހުގެ ރޭ މުމްބާއީގައި ހުންނަ އަރްބާޒްގެ ކޮއްކޮ އަރްޕިތާ ޚާންގެ ގޭގަ އެވެ.

މީޑިއާއަށް ސިއްރުން ބޭއްވި އެ ކައިވެންޏަކީ އިސްލާމްދީނުގެ ހަމަތަކުގެ މަތިން ކުރެވުނު "ނިކާހް" އެކެވެ. ކައިވެންޏަށްފަހު ހަމަ އެގޭގައި ވަލީމާއެއް ވެސް ބޭއްވި އެވެ.

އަރްބާޒްގެ ވަލީމާ ހަފްލާގައި ދެފަރާތުގެ އާއިލާގެ އިތުރުން ބޮލީވުޑްގެ ފާހަގަ ކޮށްލެވޭ ޝަހްސިއްޔަތުން ބައިވެރިވެފައިވެ އެވެ. އެގޮތުން އޭނާގެ ބޭބެ ސަލްމާން ޚާންގެ ހުށައެޅުމެއް ވެސް ހަފްލާގެ ތެރެއިން ފެނިގެންދިޔަ އެވެ.

ކައިވެނި ހަފްލާގެ ތެރެއިން ނަގާފައިވާ ފޮޓޯތައް މިހާރު ސޯޝަލް މީޑިއާއާއި އިންޓަނެޓުގައި ދައުރުވަމުން އަންނައިރު އެ ދެމީހުން ފެންނަނީ ވަރަށް ޝާހީ ކޮށެވެ.

މިއީ އަރްބާޒްގެ ދެވަނަ ކައިވެންޏެވެ. އޭނާގެ ފުރަަތަމަ ކައިވެންޏަކީ އެކްޓްރެސް މަލައިކާ އަރޯރާއާ ކުރެވުނު ކައިވެންޏެކެވެ. އެ ކައިވެނި ދެމިއޮތީ 1998 ން 2017 އަށެވެ.