ސިނަމާތަކުގައި މިހާރު ދައްކަމުން އަންނަ ޝާހްރުކް ޚާންގެ ފިލްމު "ޑަންކީ"ގެ ހާއްސަ ޝޯއެއް އިންޑިއާގެ ރިޔާސީ ގަނޑުވަރުގައި ބާއްވައިފި އެވެ.

"ރާޖްޝްރަޕަތީ ބަވަން"ގައި ބޭއްވި އެ ޑަންކީގެ އެ ޝޯއަކީ އިންޑިއާގެ ރައީސާއި ސަރުކާރުގެ އިސް މަގާމުތަކުގައި ތިބި ބޭފުޅުންނަށް ހާއްސަ ކުރެވިގެން ބޭއްވުނު ޝޯ އެކެވެ.

މިކަމާ ބެހޭ ގޮތުން ފިލްމުގެ ޑައިރެކްޓަރު ރާޖްކުމާރު ހިރާނީ ބުނީ ރިޔާސީ ގަނޑުވަރުގައި ފިލްމުގެ ޝޯއެއް އެޅުވުމަކީ އެ ފިލްމަށާއި ފިލްމުގެ ޓީމަށް ލިބޭ ބޮޑު ޝަރަފެއް ކަމަށެވެ.

ޝާހްރުކް ޚާންގެ އިތުރުން ތާޕްސީ ޕަންނޫ، ވިކީ ކައުޝަލް އަދި ބޮމަން އިރާނީ މުހިއްމު ރޯލުތަކުން ފެންނަ ޑަންކީއަކީ އިންޑިއާގެ ގައުމީ މައްސަލައަކަށްވެފައިވާ ގާނޫނާ ހިލާފަށް ގައުމަށް މީހުން އެތެރެވުމާ ބެހޭ ގޮތުން ހަދާފައިވާ ފިލްމެކެވެ.

ޑިސެމްބަރު 21 ވަނަ ދުވަހު އާއްމު ސިނަމާތަކުގައި ފިލްމު ދައްކަން ފަށާފައިވާއިރު އެންމެ ފަސް ދުވަހުގެ ތެރޭގައި ފިލްމު ވަނީ200 ކްރޯޑް ރުޕީސްގެ އާމްދަނީއެއް ހޯދާފަ އެވެ.