ބޮލީވުޑްގެ އެކްޓްރެސް އަދި ވިޔަފާރިވެރިޔާ މަލައިކާ އަރޯރާ ވެސް ވަރަށް އަވަހަށް ކައިވެނި ކުރަން އުޅޭ ކަމުގެ އިޝާރާތެއް އޭނާ ދީފި އެވެ.

މަލައިކާ މި ބީދައިން ވާހަކަ ދައްކާފައިވަނީ މިހާރު ކަލާސްއިން ދައްކަމުން އަންނަ ޖަލަކް ދިކަލާޖާގައި ފަރާ ޚާން ކުރި ސުވާލަކަށް ޖަވާބު ދެމުންނެވެ.

ދެން ދުވަހަކު ވެސް ކައިވެންޏެއް ކޮށްފާނަންތޯ ފަރާ ސުވާލު ކުރުމުން މަލައިކާ ބުނީ އިންނާނެ މީހަކު ހުރިނަމަ މިހާރުވެސް އޭނާ ތައްޔާރު ކަމަށެވެ.

މަލައިކާ މިހާރު ލޯބީގެ ގޮތުން ގުޅިގެން އުޅެނީ އޭނާއަށްވުރެ އުމުރުގެ ގޮތުން ވަރަށް ހަގު، އެކްޓަރު އަރުޖުން ކަޕޫރުއާ އެވެ. އެ ދެމީހުން އެކުގައި އުޅޭތާ ގިނަ ދުވަސްތަކެއް ވެއްޖެ އެވެ.

މަލައިކާ މި ގޮތަށް ވާހަކަ ދައްކާފައި މިވަނީ އޭނާގެ ކުރީގެ ފިރިމީހާ އަރްބާޒް ޚާން ދެވަނަ ކައިވެންޏެއް ކުރިތާ ކުޑަ ދުވަސްކޮޅެއް ފަހުންނެވެ.

ޑިސެމްބަރު 24ގައި އަރްބާޒްއާއި މޭކަޕް އާޓިސްޓް ޝުރާ ޚާން ކައިވެނިކުރި އިރު އެ ދެމީހުން މިހާރު ވަނީ ހަނީމޫނަށް ފުރާފަ އެވެ.