23 އަހަރަށްފަހު ބޮލީވުޑްގެ މަޝްހޫރު ތަރި އަމީތާބު ބައްޗަން "ކޯން ބަނޭގާ ކަރޯޑްޕަތީ"އިން ވަކިވެފައިވާ ކަމުގެ އަޑުތައް ގަދަވެއްޖެ އެވެ.

ސޮނީ ޓީވީއިން ދުރަށް ދައްކާ ކުއިޒް ޝޯއެއް ކަމަށްވާ ކޯން ބަނޭގާ ކްރޯޑްޕަތީ މިދިޔަ 23 އަހަރު ހުށައަޅައިދިން އަމީތާބް އެ ޝޯއިން ވަކިވި ކަމަށް އަޑު ފެތުރިފައި މިވަނީ އެޝޯގެ އެންމެ ފަހުގެ އެޕިސޯޑުގައި އޭނާ ދެއްކި ވާހަކައިންނެވެ.

އަމީތާބު ބުނީ އެ ސްޓޭޖުގައި ހުންނަން ލިބުމަކީ އޭނާއަށް ލިބުނު ބޮޑު ފަހުރެއް ކަމަށާއި އެހެން ނަމަވެސް މިއީ އެ ސްޓޭޖުން އޭނާ ފެންނާނެ އެންމެ ފަހު ފަހަރު ކަމަށެވެ.

އަމީތާބުގެ މި ބަސްކޮޅުން އޭނާ ވަކިވީ ޝޯގެ މި ސީޒަންއާ ކަމެއް ނުވަތަ މުޅި ޝޯއާ ކަމެއް ސާފު ނުވިޔަސް ގިނަ ބަޔަކު ލަފާކުރާ ގޮތުގައި އޭނާ އެ ވަކިވީ މުޅި ޝޯއިންނެވެ.

މިހާރު އުމުރުން 81 އަހަރުގެ އަމީތާބު ކޯން ބަނޭގާ ކްރޯޑްޕަތީ ހުށައަޅައިދިނުމުގައި ގެންގުޅުނު އުކުޅުތަކަކީ ބެލުންތެރިން ޝައުގުވެރި ކުރުވި އުކުޅު ތަކެކެވެ.

އެހެން ކަމުން ގިނަ ބަޔަކު އަންނަނީ އަމީތާބުއާ ނުލާ އެ ޝޯގެ އަސްލު ފުރިހަމަކަން ނުފެންނާނެ ކަމަށް ބުނެ ސޯޝަލް މީޑިއާގައި ޝުއޫރު ފާޅު ކުރަމުންނެވެ.