ބޮލީވުޑްގެ މަޝްހޫރު އެކްޓަރު ޖޯން އަބްރަހަމް އިންޑިއާގެ ނަން ހިނގާ ސަރަހައްދަކުން ބޮޑު ގެއެއް ގަނެފައިވާ ކަމަށް ހަބަރުތައް ބުނެފި އެވެ.

ޖޯން ގަތް 70.83 ކްރޯޑް ރުޕީސްގެ އަގުބޮޑު އެ ގެ ހުންނަނީ ކަރްގެ ލިންކިން ރޯޑުގަ އެވެ. މި ސަރަހައްދުގައި އިންޑިއާގެ މަޝްހޫރު ޝަހުސިއްޔަތުންގެ ގެތައް ހުރެ އެވެ.

ހަބަރުތައް ބުނާ ގޮތުގައި 7700 އަކަފޫޓުގެ ބިމެއްގައި އިމާރާތްކޮށްފައިވާ އެގޭގެ ސިޓިންރޫމްގައި އެކަނި ވެސް 5400 އަކަފޫޓު ހުރެ އެވެ.

2023 ވެފައިވަނީ ޖޯންއަށް ކާމިޔާބު އަހަރަކަށެވެ. އެ އަހަރުގެ ޖެނުއަރީ މަހު ނުކުތް ޕަތާންގައި އޭނާ ދައްކުވައިދިން ޖިމްގެ ރޯލަކީ ގިނަ ބައެއްގެ ތައުރީފް ލިބުނު ރޯލެކެވެ.

އާ ގެއާއެކު ޖޯންގެ މިލުކިއްޔާތު އިތުރަށް ފުޅާވެފައިވާއިރު މީގެ ކުރިން ވެސް އޭނާއަކީ ވިޔަފާރިވެރި އެކެވެ. އެގޮތުން ފިލްމުތައް އުފެއްދުމުގެ އިތުރުން އިންޑިއަން ފުޓްބޯލް ލީގުގައި އޭނާގެ ޓީމެއްވެސް އޮވެ އެވެ.