ކުރީގެ ޓްރާންސްޕޯޓް މިނިސްޓަރު އައިޝަތު ނަހުލާ މި އަހަރު ބާއްވާ ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާ އަށް ވާދަކުރެއްވުމަށް ނިންމަވައިފި އެވެ.

މަޝްހޫރު ވިޔަފާރިވެރިޔާ އަދި މާމިގިލި ދާއިރާގެ މެމްބަރު ގާސިމް އިބްރާހިމްގެ އަނބިކަނބަލުން އައިޝަތު ނަހުލާ "އެކްސް"ގައި ރޭ ކުރެއްވި ޕޯސްޓެއްގައި ވިދާޅުވީ މިއަހަރު ބާއްވާ މަޖިލިސް އިންތިހާބުގައި ވާދަކުރެއްވުމަށް ނިންމާފައިވާ ކަމަށެވެ. ހުޅުމާލެ ދެކުނުދާއިރާގެ ރައްޔިތުން ތާއީދުކޮށް ވޯޓު ދޭނެ ކަމަށް އުއްމީދު ކުރައްވާކަމަށްވެސް ނަހުލާ ވިދާޅުވި އެވެ.

ނަހުލާއަކީ ނިމިދިޔަ ސަރުކާރުގެ ޓްރާންސްޕޯޓު މިނިސްޓަރެވެ. އަދި ޖުމްހޫރީ ޕާޓީގެ ނައިބުގެ މަގާމަށް ނަހުލާ އިންތިހާބުކޮށްފައިވަނީ މިދިޔަ އަހަރުގެ ފެބްރުއަރީ މަހުގެ 26 ވަނަ ދުވަހު ބޭއްވި އެ ޕާޓީގެ ގައުމީ ކޮންގްރެސްގައެވެ.

ނަހުލާ ވާދަކުރައްވަން ނިންމަވާފައިވަނީ ޖުމްހޫރީ ޕާޓީގެ ޓިކެޓުގަ އެވެ. ޖޭޕީގެ ޓިކެޓުގައި މަޖިލީހަށް ވާދަކުރުމަށް އެދުމުގެ ފުރުސަތު މި މަހުގެ 25 އާ ހަމައަށް އެ ޕާޓީން ވަނީ ހުޅުވާލާފަ އެވެ. ނަހުލާއަކީ މިހާރު ޖޭޕީގެ ޑެޕިއުޓީ ލީޑަރެވެ.

ހުޅުމާލެ ދެކުނު ދާއިރާއަކީ 20 ވަނަ ރައްޔިތުންގެ މަޖިލީހަށް އިލެކްޝަންސް ކޮމިޝަނުން އިތުރުކުރި ދާއިރާތަކުގައި ހިމެނޭ އެއް ދާއިރާ އެވެ. 19 ވަނަ މަޖިލީހުގައި ހުޅުމާލެ އޮންނަނީ އެއް ދާއިރާއެއްގެ ގޮތުގަ އެވެ.

މަޖިލީސް އިންތިހާބު ގައި ހުޅުމާލެ ދެކުނު ދާއިރާއަށް ވާދަކުރައްވަން ނަހުލާ ނިންމެވިއިރު އެކަމަނާގެ ފިރިކަލުން ގާސިމް އިބްރާހިމް ވެސް ވަނީ އިތުރު ދައުރަކަށް މާމިގިލީ ދާއިރާއަށް ވާދަ ކުރައްވަން ނިންމަވާފައެވެ.