އެކްޓަރެއްގެ ގޮތުގައި މާ ބޮޑު ކުރިއެރުމެއް ނުލިބުމުން މިހާރު ޕްރޮޑިއުސަރެއްގެ ޒިންމާ ނަގަމުން އަންނަ ޖެކީ ބަގްނާނީ އާއި ޒުވާން ބަތަލާ ރަކުލް ޕްރީތު ސިންގް އަންނަ މަހު 22 ގައި ކައިވެނި ކުރުމަށް ނިންމައިފި އެވެ.

މީޑިއާ ރިޕޯޓްތައް ބުނާ ގޮތުގައި ރަކުލް އާއި ޖެކީ ކައިވެނި ކުރުމަށް ހަމަޖެހިފައި ވަނީ އަންނަ މަހުގެ 22 ގައި ކަމަށެވެ. އަދި ވަރަށް ކުލަގަދަކޮށް ކައިވެނީގެ ހަފުލާ ބާއްވާނީ ގޯއާގައި ކަމަށް މީޑިއާތަކުން ބުންޏެވެ.

ބޮލީވުޑްގައި މިހާރު ވަރަށް ބޮޑު ޑިމާންޑެއް އޮތް އަދި އިންޑިއާގެ ދެކުނުގެ ފިލްމުތައް ވެސް ކުޅޭ ޒުވާން ބަތަލާ އުމުރުން 33 އަހަރުގެ ރަކުލް އާއި އުމުރުން 39 އަހަރުގެ ޖެކީ ރައްޓެހިވެގެން އުޅޭކަން އިއުލާނުކުރީ 2021 ވަނަ އަހަރުގެ އޮކްޓޯބަރު މަހުގެ ތެރޭގަ އެވެ.

ރަކުލާއި ޖެކީގެ ކައިވެނި ކުރުމަށް ތައްޔާރުވަމުން އަންނައިރު އެ ދެ މީހުން މި ވަގުތު ދަނީ ބެންގްކޮކްގެ ތައިލެންޑްގައި ޗުއްޓީ ހޭދަކުރަމުންނެވެ. މީގެ ކުރިން ރަކުލް އާއި ޖެކީ ވަނީ އެކި ފަހަރު މަތިން ރާއްޖެއަށްވެސް ޗުއްޓީ ހޭދަކުރުމަށް އައިސްފަ އެވެ.

ރަކުލް އެންމެ ފާހަގަކޮށްލެވޭ ހިންދީ ފިލްމުތަކުގެ ތެރޭގައި "ދޭ ދޭ ޕިޔާރު ދޭ"، "ރަންވޭ 34"، "ޑޮކްޓަ ޖީ" އަދި "ޗަތުރީވާލީ" ހިމެނެ އެވެ.

ރަކުލް ދެން އެންމެ އަވަހަށް ބެލުންތެރިންނަށް ފެންނާނީ ސައުތު އެކްޓަރު ކަމާލް ހާސަންއާއެކު ކުޅޭ ފިލްމު "އިންޑިއަން2"އިންނެވެ.

ޖެކީ އަކީ މަޝްހޫރު ފިލްމު ޕްރޮޑިއުސަރު ވާޝޫ ބަގްނާނީ ދަރިއެކެވެ. އާއިލީ ފިލްމު ކުންފުނި، ޕޫޖާ އެންޓަޓައިންމަންޓް ހިންގުމުގައި މިހާރު އެންމެ އިސްކޮށް އުޅެނީ ޖެކީ އެވެ. އޭނަ ޕްރޮޑިއުސަރެއްގެ ޒިންމާތައް ނަގަމުން އަންނަ އިރު، އިންޑަސްޓްރީ އަށް ފުރަތަމަ ނުކުތީ އެކްޓަރެއްގެ ގޮތުގަ އެވެ. ޖެކީގެ ފުރަތަމަ ފިލްމަކީ 2009 ގެ "ކަލް ކިސްނޭ ދޭކާ" އެވެ. އޭނަ އެންމެ ފަހުން ފެނިފައި ވަނީ 2018 ގެ ތަމަޅަ ފިލްމު "މޯހިނީ" ގެ ރޯލަކުންނެވެ. ޖެކީ ކުޅުނު ފިލްމުތަކުގެ ތެރެއިން ކިރިޔާ ވެސް ފާހަގަކޮށްލެވޭ ފިލްމަކީ 2011 ގެ "ފާލްތޫ" އެވެ