ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑްރިންގެ ކުށުގައި ކުރީގެ ރައީސް އަބްދުﷲ ޔާމީން 11 އަހަރަށް ޖަލަށްލާން ހުކުމް ކުރި މައްސަލަ ހައި ކޯޓުގައި އޮންނަތާ އެތައް ދުވަހެއްވީ އިރު ވެސް އެ މައްސަލަ އަވަސް ކުރުމުގެ ނިޔަތެއް ހައި ކޯޓުގައި ނެތް ކަމަށް ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލް މިއަދު ވިދާޅުވެއްޖެ އެވެ.

ޔާމީންގެ މައްޗަށް ކްރިމިނަލް ކޯޓުން އިއްވި 11 އަހަރުގެ ޖަލު ހުކުމް ހައި ކޯޓުގައި އިސްތިއުނާފްކޮށްފައިވާ އިރު، އެ މައްސަލައިގެ އަޑުއެހުންތައް ނިމި ހުކުމަކާ ހަމައަށް ގޮސްފައި އޮންނަތާ މިހާރު އެތައް ދުވަހެއްވެއްޖެ އެވެ. މި މައްސަލައިގައި ހައި ކޯޓުގައި އެންމެ ފަހުން އަޑު އެހުމެއް ބޭއްވީ މިދިޔަ ނޮވެމްބަރު 21 ގަ އެވެ.

ޔާމީންގެ މައްޗަށް 11 އަހަރުގެ ޖަލަށްލުމަށާއި ފަސް މިލިއަން ޑޮލަރުން ޖޫރިމަނާ ކުރަން ކްރިމިނަލް ކޯޓުން ހުކުމް ކުރީ ޑިސެމްބަރު 25، 2022 ގައެވެ. އެ ހުކުމް ކުރިތާ މިހާރު އަހަރަކަށް ވުރެ ގިނަ ދުވަސްވެފައިވާ އިރު، ހައިކޯޓުގެ ހުކުމް ލަސްވާތީ ޕީޕަލްސް ނެޝަނަލް ފްރަންޓް (ޕީއެންއެފް) ގެ ބޭފުޅުން ވަނީ މިހާތަނަށް ދެ ފަހަރު ކޯޓަށް ވަޑައިގެންފަ އެވެ.

ހައި ކޯޓުގެ ބޭރުގައި މިއަދު ނޫސްވެރިންނާ ވާހަކަ ދައްކަވަމުން މަލީހު ވިދާޅުވީ ޔާމީންގެ މައްސަލަ ލަސްވާ މައްސަލައިގައި ކޯޓަށް ދިއުމުން މައްސަލަ ތާވަލް ކުރާނެ އިރެއް ނޭނގޭ ކަމަށް ބުނެ ކޯޓުން ޖަވާބު ދީފައިވާ ކަމަށެވެ. ހައި ކޯޓުން ލިބުނު ޖަވާބާ މެދު ކަންބޮޑުވެވަޑައިގަންނަވާ ކަމަށާއި އެއީ ކޯޓުން ދެއްކީ ހުއްޖަތެއް ކަމަށް ގަބޫލު ނުކުރައްވާ ކަމަށް އޭނާ ވިދާޅުވި އެވެ.

"މިއަދު ރާއްޖޭގެ ހައި ކޯޓުން އަޅުގަނޑުމެންނަށް ލިބުނު ޖަވާބަކީ އަޅުގަނޑުމެން އިންތިހާއަށް ކަންބޮޑުވާ ޖަވާބެއް. އަޅުގަނޑުމެން މިހާރު ގަބޫލުކުރާ ގޮތުގައި މައްސަލަ މިހާރު ގޮސްފައިވާ ހިސާބުން އިތުރަށް ލަސްވެގެން ދިޔުމަކީ އެއްގޮތަކަށް ވެސް ރާއްޖޭގެ ގާނޫނު އާސާސީ އާއި ކޯޓުތަކުގެ ގާނޫނާ އެއްގޮތުން ދެއްކޭނެ ހުއްޖަތެއް ނޫންކަމަށް އަޅުގަނޑުމެން ގަބޫލު ކުރަނީ." މަލީހު ވިދާޅުވިއެވެ.

މަލީހު ވިދާޅުވީ ޔާމީން މިނިވަން ކުރުމަށް ރާއްޖޭގެ ޖުޑިޝަރީގެ ދޮރުގައި ޓަކި ޖަހާ ޖަހާ ވަރުބަލިވެއްޖެ ކަމަށާއި ކޯޓުން މި މައްސަލަ އަވަސްކުރުމުގެ ނިޔަތެއް ނެތުމަކީ ރައްޔިތެއްގެ ހައިސިއްޔަތުން މިކަންކަމާއި ދޭތެރޭ އިންތިހާއަށް ކަންބޮޑުވެވަޑައިގަންނަވާ ކަމެއް ކަމަށެވެ.

"ޖުޑިޝަރީ ދޮރުގައި ޓަކި ޖަހައި ޖަހައި ވަރުބަލިވެއްޖެ. ރައީސް ޔާމީން ހުންނެވީ ޖަލުގައި. ހައި ކޯޓު މިއީ ދެވަނަ އަށް އެންމެ ބޮޑު ކޯޓުގެ ވާހަކަ މިކިޔަނީ. އެޕީލް ކޯޓެއްގެ ވާހަކަ. ކޯޓުން މި މައްސަލަ އަވަސް ކުރުމުގެ ނިޔަތެއް ނެތުމަކީ ދިވެހި ރައްޔިތެއްގެ ހައިސިއްޔަތުން މިކަމާ މެދުގައި އިންތިހާ އަށް ކަންބޮޑުވާ ކަމެއް،" މަލީހު ވިދާޅުވި އެވެ.

މަލީހު ވިދާޅުވި ގޮތުގައި ކޮންމެ އިންތިހާބެއް އަންނަ އިރަށް، ޔާމީން ޖަލުގައި ބާއްވައިގެން އިންތިހާބު ބޭއްވުމަކީ ރައްޔިތުން އެދޭނެ ގޮތެއް ނޫނެވެ. އަދި އެއީ ރާއްޖޭގެ ގާނޫނުއަސާސީ އާއި ގާނޫނުތައް ތަންދޭ ކަމެއް ނޫން ކަމަށް މަލީހު ވިދާޅުވި އެވެ.

މަލީހު ވަނީ މި މައްސަލަ އެހާ ބޮޑަށް ލަސްވެގެން އުޅޭ އިރު، ޖުޑިޝަލް ސާވިސް ކޮމިޝަން (ޖޭއެސްސީ) އާއި ކަމާބެހޭ އެހެނިހެން ފަރާތްތަކުން ކޮބައިތޯ ސުވާލު ކުރައްވައިފަ އެވެ. އަދި މި މައްސަލަ އަވަސް ކުރަން ސަރުކާރުން ގޮވާލާ ތަނެއް ވެސް ނުފެންނަ ކަމުގައި މަލީހު ވިދާޅުވި އެވެ.

އޭނާ މިއަދު ވެސް ވަނީ ޔާމީންގެ މައްސަލަ ހައި ކޯޓުގައި ތާވަލްކޮށްދީ، ވީ އެންމެ އަވަހަކަށް، އިންސާފުވެރިކަމާ އެކުގައި މި މައްސަލަ ނިންމަވައި ދެއްވުމަށް އެދިވަޑައިގެންފަ އެވެ.

ޔާމީން މިވަގުތު ހުންނެވީ ގޭ ބަންދަށް ބަދަލުކޮށްފަ އެވެ. އެމަނިކުފާނަށް ބައެއް ލުއިތައް ވެސް ވަނީ ދީފަ އެވެ.