ކާމިޔާބު ފިލްމު ފްރަންޗައިޒްއެއް ކަމަށްވާ "ބޫލް ބުލައްޔާ"ގެ ތިންވަނަ ބައިން އެ ފްރެންޗައިޒްގެ އެންމެ މަގުބޫލު ތަރި ވިދްޔާ ބާލަން ފެންނާނެ ކަމަށް ހަބަރުތައް ބުނެފި އެވެ.

ވިދްޔާ އެ ފިލްމަށް އާނބަސް ބުނެފައިވާއިރު ބޫލް ބުލައްޔާގެ ފުރަތަމަ ބައިގައި ވިދްޔާ ކުޅެދިން "މަންޖުލިކާ"ގެ ރޯލަކީ އޭނާގެ ކެރިއަރުގައި ކުޅުނު އެންމެ ކާމިޔާބު އެއް ރޯލެވެ.

މި އަހަރުގެ ދިވާލީއާ ދިމާކޮށް ނެރެން ހަމަޖެހިފައިވާ "ބޫލް ބުލައްޔާ 3"ގައި ވިދްޔާގެ އިތުރުން ދެން ފެނިގެންދާނީ އަރަމުން އަންނަ ތަރި ކާތިކް އާރްޔަން އެވެ.

ކާތިކް ވަނީ އެ ފްރެންޗައިޒްގެ ދެވަނަ ބައިންވެސް ފެނިގެން ގޮސްފަ އެވެ. އޭނާގެ އިތުރުން ދެން އެ ފިލްމުގައި އުޅުނީ ތާބޫއާއި ކިއާރާ އަދްވާނީ އެވެ. އެހެން ނަމަވެސް އެކި ސަބަބުތަކަށްޓަކައި ތާބޫ ވަނީ ފިލްމުގެ ތިންވަނަ ބަޔަށް ނޫނެކޭ ބުނެފަ އެވެ.

ބޫލް ބުލައްޔާ 3ގެ ލީޑަށް ވިދްޔާ ހަމަޖެހުމާއެކު ގިނަ ބަޔަކު އަންނަނީ ޝުއޫރު ފާޅު ކުރަމުންނެވެ. އެގޮތުން ވިދްޔާއަކީ އޮރިޖިނަލް ކަމަށާއި އޭނާ ވައްޓާނުލެވޭނެ ކަމަށް ގިނަ މީހުން ބުނެ އެވެ.

އެއާއެކު އާއްމުން އަންނަނީ ފުރަތަމަ ފިލްމުގައި ވިދްޔާއާއެކު ފެނިގެންދިޔަ އަކްޝޭ ކުމާރު ވެސް މި ފިލްމަށް ނެގުމަށް ޕްރޮޑިއުސަރުންގެ ކިބައިން އެދެމުންނެވެ.