ސީއެންއެންއާއި ނިއުސް 18 ގުޅިގެން ބާއްވަމުން އަންނަ އިންޑިއަން ޕްރިމިއާ ޓެލެވިޒަން އެވޯޑްސްގައި ދެވޭ އެންމެ ޝަރަފުވެރި އެވޯޑް ކަމަށްވާ "އިންޑިއަން އޮފް ދަ އިޔާ"ގެ އެވޯޑު ފިލްމީ ތަރި ޝާހްރުކް ޚާންއަށް ލިބިއްޖެ އެވެ.

މި އެވޯޑަކީ ހަތް ދާއިރާއެއްގެ މެދުގައި އެންމެ ބޮޑު ކާމިޔާބީތަކެއް ހޯދާފައިވާ ފަރުދީ ޝަހްސިއްޔަތަކަށް ދެވޭ އެވޯޑެެކެވެ. އެ ދާއިރާތަކަކީ ވިޔަފާރި، މުނިފޫހި ފިލުވުން، ކުޅިވަރު، ޒުވާނުން ކުރިއެރުވުން، ޒުވާން ކުޅިވަރު ތަރި، އިޖުތިމާއީ ޚިދުމަތްތައް އަދި މޫސުމާ ބެހޭ ގޮތުން ހޭލުންތެރިކަން އިތުރު ކުރުމެވެ.

އަހަރުގެ އެންމެ ކާމިޔާބު އިންޑިއާ ރައްޔިތަކަށް ދެވޭ އެ އެވޯޑު ޝާހްރުކް ޚާންއަށް ލިބުނުއިރު 2023 ވަނަ އަހަރު ވެފައިވަނީ އޭނާއަށް ފާހަގަކޮށްލެވޭ ކާމިޔާބު އަހަރަކަށެވެ.

އެގޮތުން މިދިޔަ އަހަރު ޝާހްރުކް ޚާންގެ ތިން ފިލްމެއް ރިލީޒް ކުރެވުނުއިރު އޭގެ ތެރެއިން "ޕަތާން" އަދި "ޖަވާން"އަށް ވަނީ 1000 ކްރޯޑްއަށްވުރެ ބޮޑު އާމްދަނީއެއް ލިބިފަ އެވެ.

މި އެވޯޑަށް ޝާހްރުކް ޚާންގެ އިތުރުން ނޮމިނޭޓްވި ޝަހްސިއްޔަތުންގެ ތެރޭގައި ފިލްމީ ތަރި ދީޕިކާ ޕަދުކޯން، ޕްރޮޑިއުސަރު މަނީ ރަތުނާމް، ކުޅިވަރު ތަރި ޝުބަމް ގިލް އަދި ވިޔަފާރިވެރިޔާ އަރުން ކްރިޝަންނާމުރްތީ ފަދަ ޝަހްސިއްޔަތުތައް ހިމެނެ އެވެ.

އެވޯޑާ ހަވާލުވަމުން ޝާހްރުކް ޚާން ބުނީ އޭނާއަކީ ހަމައެކަނި އަހަރުގެ "އިންޑިއަން" ނޫން ކަމަށާއި މުޅި ހަޔާތުގައި ވެސް އޭނާއަކީ "އިންޑިއަން"އެއް ކަމަށެވެ.