ބޮލީވުޑް ތަރި އާމިރު ޚާންގެ ދަރިފުޅު އިރާ ޚާންއާއި އޭނާގެ ފިރިމީހާ ނުޕުރް ޝިކާރޭގެ ކައިވެނި ހަފްލާއަށް ގިނަ އަދަދެއްގެ ބޮލީވުޑް ތަރިން ގޮސްފި އެވެ.

މިދިޔަ ހޮނިހިރު ދުވަހުގެ ރޭ މުމްބާއީގައި އޮތް އެ ކުލަގަދަ ހަފްލާގެ ތެރެއިން ބޮލީވުޑްގެ ނަންކިޔާ މަޝްހޫރު ފަންނާނުން ފެނިފައިވެ އެވެ.

އެގޮތުން އެ ހަފްލާއިން ފެނުނު ތަރިންގެ ތެރޭގައި ޝާހްރުކް ޚާން، ސަލްމާން ޚާން، ރަންބީރު ކަޕޫރު، ކެޓްރީނާ ކައިފް އަދި ސުޝްމިތާ ސެން ފަދަ ތަރިން ހިމެނެ އެވެ.

އިރާއާއި ނުޕުރް ކައިވެނި ކޮށްފައިވަނީ މިމަހުގެ ކުރީކޮޅު ވަކިވަކިން ބޭއްވި ދެ ހަފްލާއެއްގަ އެވެ. ދެ ސަގާފަތަކާ އެއްގޮތަށް ބޭއްވި އެ ކައިވެނިން ފެނުނީ އާއިލާގެ މެމްބަރުން އެކަންޏެވެ.

އެހެން ނަމަވެސް އާމިރުގެ ބޮލީވުޑް ރަހުމަތްތެރިންނަށް ހާއްސަކޮށް މުމްބާއީގައި ބޭއްވި ކުލަގަދަ ހަފްލާއަށް ގިނަ އަދަދެއްގެ ބަޔަކު އައިސްފައިވެ އެވެ.

ނުޕުރްއަކީ އިންޑިއާގެ ވިޔަފާރި އާއިލާއަކަށް ނިސްބަތްވާ ފަރާތަކަށްވާއިރު އިރާއަކީ އާމިރުގެ ހުރި ހަމައެކަނި އަންހެން ދަރިފުޅެވެ. އެއީ ރީނާ ދައްތާއާއެކު އޭނާ ކުރި ކައިވެންޏަށް ލިބުނު ދެ ކުދިންގެ ތެރެއިން އެއް ކުއްޖެކެވެ.