މިދިޔަ އަހަރު ފަހުކޮޅު ނެރުނު ފިލްމު "އެނިމަލް"އަކީ ފަހުގެ ތާރީހެއްގައި ނެރެވުނު އެންމެ ކާމިޔާބު އެއް ބޮލީވުޑް ފިލްމު ކަމުގައި ބުނެވިދާނެ އެވެ.

އެ ފިލްމުގައި ވިލަންއެއްގެ ރޯލުން ފެނިގެންދިޔަ ބޮބީ ޑިއޯލްގެ ކެރެކްޓަރަކީ ނެގެޓިވް ކެރެކްޓަރެއް ކަމުގައި ވިޔަސް އެ ކެރެކްޓާއަށް ގިނަ ބައެއްގެ ލޯބި ވަނީ ލިބިފަ އެވެ.

މިކަމަށް އިޝާރާތްކޮށް ބޮލީވުޑްގެ ކިންގް ޚާންގެ ގޮތުގައި މަޝްހޫރުވެފައިވާ ޝާހްރުކް ޚާން މިވަނީ އޭނާގެ ހިޔާލު ފާޅުކޮށް ވާހަކަ ދައްކާފަ އެވެ.

ޝާހްރުކް ޚާން ބުނީ ނެގެޓިވް ރޯލުތަކަކީ މީހުންގެ ލޯބި ލިބިގެންވާނެ ކެރެކްޓަރުންތަކެއް ނޫން ކަމަށާއި އެހެންވާނަމަ އެ ފެށެނީ ވަރަށް ނުރަނގަޅު ސަގާފަތެއް ކަމަށެވެ.

އެގޮތުން އޭނާ ވިލަންއެއްގެ ރޯލު ކުޅޭނަމަ އެ ކެރެކްޓަރުގެ ސަބަބުން މީހުން އޭނާދެކެ ރުޅި އަންނަ ވަރު ކުރާނެ ކަމަށް ޝާހްރުކް ޚާން ބުންޏެވެ.

ޝާހްރުކް ޚާންގެ މި ވާހަކަތަކަކީ ނުސީދާ ގޮތެއްގައި އެނިމަލްއަށް ރައްދުކުރި ވާހަކަ ތަކެއް ކަމަށް މީޑިއާގައި މިހާރު އަންނަނީ ހަބަރު ފެތުރެމުންނެވެ.

ޝާހްރުކް ޚާން ވަނީ މީގެ ކުރިން ގިނަ ނެގެޓިވް ރޯލުތަކަކުން ފެނިގެން ގޮސްފަ އެވެ. އޭގެ ތެރޭގައި "ޑަރް"، "ޑުޕްލިކޭޓް" އަދި "ޑޮން" ފަދަ ފިލްމުތައް ހިމެނެ އެވެ.