ބޮލީވުޑްގެ ގިނަ ފލްމުތަކަކުން ފެނި އާއްމުންގެ މަގުބޫލުކަން ހޯދާފައިވާ ޕަރިނީތީ ޗޯޕްރާ ލަވަކިޔުމުގެ ދާއިރާއަށް ވަންނަން އުޅޭކަން އިއުލާން ކޮށްފި އެވެ.

އެކަން އިއުލާން ކުރަމުން އިއްޔެ ޕަރިނީތީ ބުނީ ލަވަކިޔުމަކީ އޭނާ އަބަދުވެސް ކުރާ ހިތްވާ ކަމެއް ކަމަށާއި އެކަމުން އޭނާއަށް އުފާ ލިބޭ ކަމަށެވެ.

އެގޮތުން އެންޓަޓެއިންމަންޓް ކޮންސަލްޓަންޓް އެލްއެލްޕީ ނަމަކަށް ކިޔާ ރެކޯޑް ލޭބަލްއަކާއެކު އޭނާގެ ފުރަތަމަ ޕްރޮޖެކްޓްގެ ސޮއި ކޮށްފައިވާ ކަމަށް ވެސް ޕަރިނީތީ ހާމަކުރި އެވެ.

އިންޑިއަން ކްލެސިކް ސިންގިންގެ ތަމްރީނު ވެސް ލިބިގެން ހުރި ޕަރިނީތީ ވަނީ މީގެ ކުރިން މަދުން ނަމަވެސް ލަވަކިޔާފަ އެވެ. އެގޮތުން 2017 ވަނަ އަހަރު ނުކުތް އޭނާގެ ފިލްމު "މެރީ ޕްޔާރީ ބިންދޫ"ގައި ހިމެނޭ "މާނާކި ހަމޭ ޔާރް ނެހީ" ކިޔާފައިވަނީ އޭނާ އެވެ.

ޕަރިނީތީ އިތުރަށް ބުނީ މިއީ އޭނާގެ ދިރިއުޅުމުގެ މުޅިން އާ ސަފްހާއެއް ކަމަށާއި އެކަމާ މެދު ފޮނި އުއްމީދުތަކެއް ވެސް ކުރެވޭ ކަމަށެވެ.