ބޮލީވުޑްގެ މަޝްހޫރު ބައެއް ތަރިންގެ ޑީޕްފޭކް ވީޑިއޯތައް އާއްމު ވަމުން އަންނަ މި ދުވަސްވަރު ބައެއް ތަރިން އަންނަނީ މިކަމާ ބެހޭ ގޮތުން އެމީހުންގެ ހިޔާލުވެސް ފާޅު ކުރަމުންނެވެ.

އެގޮތުން އެންމެ ފަހުން މިކަމާ ބެހޭ ގޮތުން ވާހަކަ ދެއްކި ތަރިއަކީ ކާމިޔާބު ގިނަ ފިލްމުތަކެއް ކުޅެދީފައިވާ އެކްޓަރެއް ކަމަށްވާ ޝާހިދު ކަޕޫރެވެ.

ޝާހިދު ބުނީ އެފަދަ ޑީޕްފޭކް ވީޑިއޯތަކުގެ މައްސަލަތަކުގައި ވަރަށް ފަސޭހައިން "އާޓިފިޝަލް އިންޓެލިޖެންސް" ނުވަތަ ޓެކްނޮލޮޖީއަށް ތުހުމަތު ކުރެވޭ ކަމަށާއި އެހެން ނަމަވެސް ހަގީގީ މައްސަލައަކީ އަހަރުމެން އިންސާނުން ކަމަށެވެ.

މީގެ އިތުރުން އިންސާނުން މިހާރު އުޅެން ބޭނުންވަނީ ހަގީގީ ދިރިއުޅުމުގައި ނޫން ކަމަށާއި އިންސާނުންނަށް މި ހާލު ޖެހުނީ ވެސް ހުދު އެމީހުންގެ ސަބަބުން ކަމަށް ޝާހިދު ބުންޏެވެ.

ޝާހިދުގެ އިތުރުން މަޝްހޫރު ތަރި ކްރިތީ ސެނަން ވެސް ވަނީ އެފަދަ ވީޑިއޯތައް އާއްމުވަމުން ދިއުމަކީ ކަންބޮޑުވާން ޖެހޭ ކަމެއް ކަމަށް ބުނެފަ އެވެ.

ފާއިތުވި ދުވަސްތަކުގައި ޑީޕްފޭކް ވީޑިއޯގެ ޝިކާރައަކަށްވި ތަރިންގެ ތެރޭގައި ރަޝްމިކާ މަންދަނާ، އާލިއާ ބަޓް އަދި ޕްރިޔަންކާ ޗޯޕްރާ ހިމެނެ އެވެ.