އުރްފީ ޖާވިދުއަކީ އަބަދުވެސް އޭނާގެ އަމަލުތަކަށްޓަކައި ހަބަރުތަކުގެ ފަލަ ސުރުހީއިން ޖާގަ ހޯދާ ފަންނާނެކެވެ. އެއީ އޭނާގެ ހެދުންތައް ކަމުގައި ވިޔަސް ނުވަތަ ބުނާ ބުނުންތައް ކަމުގައި ވިޔަސްމެ އެވެ.

މިފަހަރު ވެސް އުރްފީ މިވަނީ މުޅިން ތަފާތު ކަމަކަށްޓަކައި ހަބަރުތަކުގެ ފަލަ ސުރުހީއަށް އަރާފަ އެވެ. މިފަހަރު އޭނާ ލައިގެން ހުރީ "ބާލީސް" ހެދުމެކެވެ.

އެންމެ ފަހުން މީޑިއާއަށް އުރްފީ ފެނުނު ފެނިލުމުގައި އޭނާ ލައިގެން ހުރި މަޑު ނޫ ކުލައިގެ ހެދުމުގައި ހުދު ކުލައިގެ ބާލީހެއް ފަދަ އެއްޗެއް ހަރު ކުރެވިފައިވެ އެވެ.

އެ ފޮޓޯތަކާއި ވީޑިއޯތައް އިންޓަނެޓުގައި އާއްމު ވުމުން ގިނަ ބަޔަކު އަންނަނީ އެކި ކަހަލަ ޝުއޫރުތައް ފާޅު ކުރަމުންނެވެ. އެގޮތުން އެއްބަޔަކު އެކަމަކީ ހިތްވަރު ބޭނުންވާ ކަމެއް ކަމަށް ބުނެ އުރްފީއަށް ތައުރީފް ކުރާއިރު އަނެއް ބަޔަކު އަންނަނީ އޭނާގެ ފެޝަނަށް ފާޑު ކިޔަމުންނެވެ.

ކޮންމެއަކަސް "ކޮންޓްރޮވާޝަލް" ތަރިއެއްގެ ގޮތުގައި ބެލެވިފައިވާ އުރްފީ އަނެއްކާ ވެސް މިވަނީ މީޑިއާއާއި އާއްމުން ހައިރާން ކޮށްލާފަ އެވެ. އެއާއެކު އުފެދޭ ސުވާލަކީ ދެން އޭނާ ފެންނާނީ ކިހިނެއްތޯ ކުރެވޭ ސުވާލެވެ.