މީގެ އަހަރުތަކެއް ކުރިން ސޮނީ ޓީވީއިން ދުރަށް ދެއްކި ކޮމެޑީ ޝޯ "ދަ ކަޕިލް ޝަރްމާ ޝޯ"އަކީ ގިނަ ބައެއްގެ މަގުބޫލުކަން ހޯދި ޝޯ އެކެވެ. އެއް ސްޓޭޖެއްގެ މަތިން އިންޑިއާގެ ނަން ކިޔާ ގިނަ ކޮމީޑިއަނުން ފެނުން ވީ ބެލުންތެރިން އެ ޝޯއަށް ގަޔާވީ ސަބަބަކަށެވެ.

އޭގެ އެއް އަހަރު ފަހުން ކުއްލި ގޮތަކަށް އެ ޝޯ ހުއްޓާލެވުނުއިރު މީޑިއާގައި އަޑު ފެތުރުނީ ޝޯގެ މައި ދެ ކޮމީޑިއަނުން ކަމަށްވާ ކަޕިލް ޝަރްމާއާއި ސުނިލް ގްރޯވާއާ ދެމެދު މައްސަލަތަކެއް ޖެހިފައިވާ ކަމަށެވެ.

މި މައްސަލަތަކުގެ ސަބަބުން ދެމީހުން އެކަކު އަނެކަކާއެކު މަސައްކަތް ކުރަން ބޭނުންނުވެ ޝޯ ހުއްޓާލަން ޖެހުނީ އެވެ. އޭގެ ފަހުން މިހާރު ހައެއްކަ އަހަރު ވެފައިވާއިރު އެ ދެމީހުން އެކުގައި އެއްވެސް ސްޓޭޖަކުން ފެނިފައެއް ނުވެ އެވެ.

އެހެން ނަމަވެސް ދާދި ފަހުން އެދެތަރިން މިވަނީ އެމީހުންގެ މެދުގައި ޖެހިފައިވާ މައްސަލަތައް ހައްލުކޮށް އެކުގައި މަސައްކަތް ކުރަން އުޅޭކަން އާއްމުކޮށް އިއުލާން ކޮށްފަ އެވެ.

އެގޮތުން ކަޕިލްއާއި ސުނިލް އެކުގައި ފެނިގެންދާނީ މަޝްހޫރު ސްޓްރީމިން ޕްލެޓްފޯމް ނެޓްފްލިކްސްގެ ހޯމް ކޮމެޑީ ޕްރޮޖެކްޓަކުންނެވެ.

ކަޕިލްއާއި ސުނިލް އެކުގައި މަސައްކަތް ކުރަން ހަމަޖެހިފައިވާއިރު އެ ދެމީހުންނާއެކު ދަ ކަޕިލް ޝަރްމާ ޝޯގައި ހަރަކާތްތެރިވި އެހެން ކޮމީޑިއަނުން ވެސް އަންނަނީ އެކަމާ އުފާ ފާޅު ކުރަމުންނެވެ.