މަޝްހޫރު ލަވަކިޔުންތެރިޔާ ސެލީން ޑިއޯން އޭނާގެ ހަޔާތުގެ މައްޗަށް ބިނާކޮށް އުފައްދާފައިވާ "އައި އޭމް ސެލީން ޑިއޯން" ޑޮކިއުމެންޓްރީ ރިލީޒް ކޮށްފި އެވެ.

އެ ޑޮކިއުމެންޓްރީގައި މިހާރު އޭނާ ތަހައްމަލު ކުރަމުން އަންނަ ބައްޔެއް ކަމަށްވާ "ސްޓިފް ޕާސަން ސިންޑްރޯމް"ގެ ތަޖުރިބާ ވަރަށް ތަފްސީލުކޮށް ކިޔައިދީފައިވެ އެވެ.

ސެލީން ބުނީ މި ޑޮކިއުމެންޓްރީގެ ސަބަބުން ބަލިތަކާއި އެެހެނިހެން ނުތަނަވަސްކަން ތަހައްމަލު ކުރަމުންދާ ފަރާތްތަކަށް ހިތްވަރު ލިބޭނެ ކަމަށް އުއްމީދުކުރާ ކަމަށެވެ.

ދުނިޔެއިން މަދުން ނޫނީ ނުފެންނަ އެސްޕީއެސް ބައްޔާ ބެހޭ ގޮތުން ވާހަކަ ދައްކަމުން ސެލީން ބުނެފައިވަނީ އެއީ މިހާރު އޭނާގެ ހަޔާތުގެ ހަގީގަތް ކަމަށާއި އެބައްޔާއެކު ދިރިއުޅެން ދަސްކުރަމުން އަންނަ ކަމަށެވެ.

އޮޓޯ އިމިއުން ބައްޔެއް ކަމަށްވާ ސްޓިފް ޕާސަން ސިންޑްރޯމްއަކީ ހަށިގަނޑުގެ މަސްތަކާއި ހަންގަނޑު ވާންވެ ހަރަކާތްތެރިވެ އުޅެން އުނދަގޫ ކުރުވާ ދުވަހަކަށްވުރެ ދުވަހެއް ހާލަތު ގޯސް ކުރުވާ ދާއިމީ ބައްޔެކެވެ. މި ބައްޔަށް އަދި ފަރުވާއެއް ހޯދިފައެއް ނުވެ އެވެ.

އާއްމުންގެ ތެރޭގައި ސެެލީން މަޝްހޫރުވެފައިވަނީ 1997 ވަނަ އަހަރު ނުކުތް ފިލްމު "ޓައިޓޭނިކް"ގެ ލަވަ "މައި ހާޓް ވިލް ގޯ އޮން"ގެ ލަވަކިޔުންތެރިޔާގެ ގޮތުގަ އެވެ.