ތާޕްސީ ޕަންނޫއަށް ބޮލީވުޑުން ފުރުސަތު ލިބުނީ ކުރީގެ ކާމިޔާބު އެކްޓްރެސް ޕްރިތީ ޒިންތާއާ ސިފަ ވައްތަރު ވުމުން ކަމަށް އޭނާ ބުނެފި އެވެ.

ދާދި ފަހުން މީޑިއާއަށް ދިން އިންޓަވިއުއެއްގައި ތާޕްސީ ބުނީ ބޮލީވުޑަށް ވަތް ދުވަސްވަރު ޕްރިތީ ޒިންތާއާ އެއްވަރަށް ފައިހަމަކުރަން މަސައްކަތް ކުރަން ޖެހުނު ކަމަށެވެ.

"އެންމެން ހީކުރީ އަހަންނަކީ ޒުވާން ޕްރިތީ ޒިންތާ ކަމަށް. އެހެންވެ އެ ވަރަށް މަސައްކަތް ކުރަން ޕްރެޝަރު ކުރިމަތިވި،" ތާޕްސީ ބުންޏެވެ.

ތާޕްސީ އިތުރަށް ބުނީ ދުވަހަކު ވެސް ޕްރިތީއާ ބައްދަލުނުވާ ކަމަށާއި އޭނާއަށް ޕްރިތީ ފެނިފައިވަނީ ޓީވީއިންނާއި ސިނަމާތަކުން ކަމަށެވެ. އެހެން ނަމަވެސް ޕްރިތީއަކީ ވަރަށް ހިތްހެޔޮ މިޒާޖެއްގެ މީހެއްކަން އެނގޭ ކަމަށް ތާޕްސީ ބުންޏެވެ.

ފިލްމީ މަސައްކަތްތަކަށް ބަލާއިރު ތާޕްސީ އެންމެ ފަހުން ފެނުނީ ޝާހްރުކް ޚާންއާއެކު ފިލްމު "ޑަންކީ"އިންނެވެ. އޭނާގެ ކުރިއަށް އޮތް ފިލްމަކީ "ފިރް އާއީ ހަސީން ދިލްރުބާ" އެވެ.