ރާއްޖެއާއި ރާއްޖެއިން ބޭރުގައި ކިޔަވަމުންދާ އެއްވެސް ދަރިވަރެއްގެ ކިޔެވުމަށް ބުރޫއަރާފަދަ ކަމެއް މެދިވެރިވިޔަ ނުދިމުނަށް ކުރެވެން އޮތް ކޮންމެކަމެއް ސަރުކާރުން ކުރާނެ ކަމަށް ހަޔާ އެޑިއުކޭޝަން މިނިސްޓްރީން ބުނެފި އެވެ.

ބޭރުގައި ކިޔަވާ ދަރިވަރުންގެ ސްޓޫޑަންޓް ލޯނާއި ސްކޮލާޝިޕް ފައިސާ ލިބުން ލަސްވެ، ކުދިން ހާލުގައި ޖެހޭ ކަމަށް ފެތުރިފައިވާ އަޑުތަކާއި ގުޅިގެން އެ މިނިސްޓްރީން ބުނީ ދަރިވަރުންގެ ކޯސްފީއާއި ލިވިންގ އެލައުންސާއި އެހެނިހެން ހަރަދުތައް ހަމަޖެހިފައިވާ އުސޫލުން، ކަނޑައެޅިފައިވާ މުއްދަތައް ބަރާބަރަށް، ދެއްކުމަކީ އެ މިނިސްޓްރީން އަބަދުވެސް ކުރަމުން އަންނަކަމެއް ކަމަށެވެ. ނަމަވެސް ބައެއްފަހަރު ބައެއް ޕޭމަންޓްތައް ޖަމާވުމުގައި ލަސްތަކެއްވާކަމަށް ގަބޫލުކުރާކަމަށާއި އެއީ އަބަދުވެސް ދިމާވާ މައްސަލައެއް ކަމަށް ހަޔާ އެޑިއުކޭޝަން މިނިސްޓްރީން ބުނެ އެވެ.

އަދި ދަރިވަރުންނަށް ދެމުންދާ ހިދުމަތްތައް އަވަސްކުރުމަށް ހިދުމަތް އޮޓެމޭޓްކޮށް ކުދިން ކިޔަވަމުންދާކަން ވެރިފައިކުރަން އޮންނަ ޕްރޮސެސް މިހާރަށްވުރެ ހަރުދަނާކުރާނެ ކަމަށް ހަޔާ އެޑިއުކޭޝަން މިނިސްޓްރީން ބުނެފައިވެ އެވެ.

ދަރިވަރުންގެ ކަންކަމާ ގުޅުވައިގެން އާންމުންގެ ހިތްތަކުގައި ނުތަނަވަސްކަން އުފެދޭގޮތަށް ހަބަރު ފަތުރާ ވަސީލަތްތަކުން އަމަލު ނުކުރުމަށް ވެސް އެ މިނިސްޓްރީން އިލްތިމާސްކޮށްފައިވެ އެވެ.

ރާއްޖޭން ބޭރުގައި ކިޔަވަމުން ދާކުދިންނަށް ސަރުކާރުންދޭ ލޯނާއި ސްކޮލާޝިޕް ފައިސާ ލަސްވުމުގެ ސަބަބުން ވަރަށް ގިނަ ކުދިންނާއި އެކުދިންގެ އާއިލާތަކަށް ދަތިތަކާ ކުރިމަތިލާން ޖެހިފައިވާ ކަމަށް ބުނެ ގިނަ ބަޔަކު އަންނަނީ ސޯޝަލް މީޑިއާގައި ދައްކަމުންނެވެ.

ކުދިންނަށް ފައިސާ ލިބުމުގެ ދަތިކަމާ ގުޅިގެން އިދިކޮޅު އެމްޑީޕީ އިން ވަނީ އިއްޔެ ރައްޔިތުން މަޖިލިސްއަށް ކުއްލި މައްސަލައެއް ހުށަހަޅާފަ އެވެ. ނަމަވެސް އެ މައްސަލަ ވަނީ ބޭރުކޮށްލާފަ އެވެ.

ސަރުކާރުން އެހީ ފޯރުކޮށްދީގެން ރާއްޖެ އާއި ރާއްޖޭން ބޭރުގައި 2،163 ދަރިވަރަކު މި ވަގުތު ކިޔަވަމުން އެބަދެ އެވެ.