ދިވެހި މިއުޒީޝަން އަހްމަދު އަދުހަމް އިންޑިއާގެ ސްޓޫޑިއޯއަކަށް ކިޔައިދީފައިވާ ފުރަތަމަ ސޯލޯ ލަވަ ނެރެފި އެވެ.

އިންޑިއާގެ ޕަންޖާބުގެ "ވިންޑިކްޓިވް ރިކޯޑްސް" ސްޓޫޑީއޯއަށް އަދުހަމް ކިޔާފައިވާ ފުރަތަމަ ސޯލަ ލަވަ ނެރެފައިވަނީ މިދިޔަ ހުކުރު ދުވަހު އެވެ.

"ރިމެމްބާ މައި ނޭމް" ނަމުގައި ނެރުނު މިލަވަ ލިރިކްސް އަދި ކޮމްޕޯސްކޮށްފައި ވަނީ ވެސް އަދުހަމް އެވެ. މިލަވައިގެ ވީޑިއޯގައި އަދުހަމް ފެނިގެންދާއިރު، އޭނާ ފެނިގެންދަނީ ބާސްކެޓް ކުޅުންތެރިއެއް ގޮތުގައި އެވެ. އޭނާ އަކީ އަސްލު ދިރިއުޅުމުގައި ވެސް ބާސްކެޓް ކުޅުންތެރިއެކެވެ.

މި ލަވައަކީ ހިޕްހޮޕް އަދި ރެޕް ސްޓައިލަށް ކިޔާފައިވާ ލަވައެކެވެ.

https://www.youtube.com/watch?v=ZKJkCgI74sw&t=2s

އަދުހަމް ވަނީ ފަސް އަހަރުގެ ކޮންޓްރެކްޓެއް "ވިންޑިކްޓިވް ރިކޯޑްސް"އާ އެކު ހަދައިފަ އެވެ. އެ ކޮންޓްރެކްޓުގައިވާ ގޮތުން ކޮންމެ އަހަރަކު އޭނާގެ އަމިއްލަ ނުވަ ލަވަ، ވީޑިއޯއާ އެކު ރިލީޒްކުރާނެ އެވެ. މިއީ މި އަހަރު ގެނެސްދިން އޭނާގެ ފުރަތަމަ ލަވަ އެވެ.

މި އަހަރު އޭނާގެ އަމިއްލަ އޮރިޖިނަލް އިނގިރޭސި ދެ ލަވަ އާއި ހިންދީ ހަ ލަވަ ނުކުންނާނެ އެވެ. މި ހުރިހާ ލަވައެއް ލިޔެ، ކޮމްޕޯޒްކުރަނީ އޭނާ އަމިއްލައަށެވެ.

މި ފުރުސަތު އަދުހަމްއަށް ލިބުނީ ޕަންޖާބުގެ ސްޓޫޑިއޯގެ ބަޔަކު ރާއްޖޭގެ ރިސޯޓަކަށް ޗުއްޓީއަށް ގޮސް އުޅެނިކޮށް އެ މީހުން ތިބި ތަނެއްގައި އޭނާ ލަވަ ކިޔުމުން އެ މީހުންނަށް އަދުހަމުގެ ލަވަ ކިޔުން ކަމުގޮސްގެންނެވެ.

އަދުހަމްގެ ސޯލޯ ލަވާގެ ކުރިން އެސްޓޫޑިއޯއާ އެކު އަދުހަމް ކޮށްފައިވާ މަސައްކަތުގެ ތެރެއިން "ހޯޕް"ގެ ނަން ދީފައިވާ ލަވައިގެ ވީޑިއޯވެސް ވަނީ ނެރެފަ އެވެ. މި ލަވައިގައި އިނގިރޭސި ބަހުން ރެޕްކޮށްފައިވާ ބައި ލިޔެ ކިޔާފައިވަނީ އަދުހަމް އެވެ.