ރާއްޖެ އައި ނޯވޭގެ ޓޫރިސްޓަކު ވިސާ ހަމަވުމުން އަނބުރާ ގައުމަށް ނުގޮސް މަހަށް ގޮސްގެން ރާއްޖޭގައި އުޅެނިކޮށް އިމިގްރޭޝަނުން ހުއްޓުވައިފި އެވެ.

އިމިގްރޭޝަނުން ބުރާސްފަތި ދުވަހު ބުނެފައިވަނީ 2023 ޑިސެންބަރު 20 ވަނަ ދުވަހު ރާއްޖެ އެތެރެވެފައިވާ ނޯވޭގެ ފަތުރުވެރިއަކު، ވިސާގެ މުއްދަތު ހަމަވުމުން ވެސް އަނބުރާ ގައުމަށް ނުގޮސް، ރާއްޖޭގެ ބޯޓެއްގައި މަސްވެރިކަމުގެ މަސައްކަތްކޮށް، ދިރިއުޅެމުންދާ ކަމަށް އެ އިދާރާއަށް މައުލޫމާތު ލިބިފައިވާ ކަމަށެވެ.

އެގޮތުން ފުލުހުންގެ އެހީތެރިކަމާއެކު ޖުލައި 25 ވަނަ ދުވަހު އޭނާ އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އެ އިދާރާއިން ބުނެ އެވެ. އިމިގްރޭޝަންގެ ގާނޫނާ ހިލާފުވެފައިވާތީ އޭނާ މިހާރު ޑީޕޯޓުކޮށްލާފައިވާ ކަމަށް ވެސް އިމިގްރޭޝަނުން ބުނެ އެވެ.

ގަވާއިދާ ހިލާފަށް އުޅޭ ބިދޭސީންނާއި ގަވާދާއި ހިލާފަށް ވިޔަފާރި ކުރަމުންދާ ބިދޭސީން ހުއްޓުވުމަށް އިމިގްރޭޝަން އާއި ފުލުހުން ގުޅިގެން ކުރައަށް ގެންދާ އޮޕަރޭޝަންގައި މިހާތަނަށް 130 އަށްވުރެ ގިނަ ބިދޭސީން ވަނީ ހުއްޓުވައިފަ އެވެ. އަދި ގަވާއިދާއި ހިލާފަށް ކުރަމުން ދިޔަ ވިޔަފާރިތައް ހުއްޓުވައި އެފަދަ ބިދޭސީން ޑީޕޯޓްކުރުމުގެ މަސައްކަތް އިމިގްރޭޝަނުން ދަނީ ކުރަމުންނެވެ.