ހިތުގެ މައި ނާރެއް ދުޅަވެ ދެކުނު އިންޑިއާގެ މަޝްހޫރު ތަރި ރަޖްނިކާންތުއަށް ޗެންނާއީގެ ހޮސްޕިޓަލެއްގައި ފަރުވާ ދެމުން އެބަދެ އެވެ.

ރަޖްނިކާންތު ފަރުވާ ހޯދަމުން އަންނަ އެޕޯލޯ ހޮސްޕިޓަލުން ނެރުނު ބަޔާނެއްގައި ބުނެފައިވަނީ ހިތުގެ މައި ނާރު ދުޅަވުމުގެ ސަބަބުން ކުރިމަތިވި އުނދަގޫތަކާއެކު ސެޕްޓެމްބަރު މަހުގެ 30 ވަނަ ދުވަހު އޭނާ ހޮސްޕިޓަލުގައި އެނދުމަތި ކުރެވިފައިވާ ކަމަށެވެ.

އެއަށްފަހު ނޮން ސާޖިކަލް އުކުޅެއް ބޭނުން ކޮށްގެން ރަޖްނިކާންތުއަށް ފަރުވާދެވި މިހާރު ހާލު ރަނގަޅު ވަމުން އަންނަ ކަމަށް ވެސް އޭނާ ބެލި ޑޮކްޓަރުންގެ ޓީމުން ބުންޏެވެ.

އެގޮތުން އެ "ޕްރޮސީޖާ" ދިޔައީ ރޭވިފައިވާ ގޮތަށް ކަމަށާއި ކުރިއަށް އޮތް ދެ ދުވަހެއްގެ ތެރޭގައި ހޮސްޕިޓަލުން ވެސް ދޫކޮށްލެވޭނެ ކަމަށް އެ ބަޔާނުގައިވެ އެވެ.

މިދިޔަ ހޯމަ ދުވަހު ރަޖްނީކާންތު ހޮސްޕިޓަލަށް ގެންދެވުނީ މެއަށް ތަދެއް އަރައި ނޭވާލާން އުނދަގޫވުމުގެ ސަބަބުން އެމަޖެންސީގަ އެވެ.

ރަޖްނީކާންތުގެ ފިލްމީ މަސައްކަތްތަކަށް ބަލާއިރު އޭނާ ދެން އެންމެ އަވަހަށް ފެންނާނީ އޮކްޓޯބަރު 11 ވަނަ ދުވަހު ރިލީޒްކުރާ ސައުތު އިންޑިއަން ފިލްމު "ވެއްޓައިޔަން" އިންނެވެ.