ހާއްސަ އެހީއަށް ބޭނުންވާ މީހަކު ރޭޕް ކުރި މައްސަލައެއް އަލުން ބަލަން ހައިކޯޓުން އިއްޔެ އަމުރުކޮށްފި އެވެ.

މިކަން ހިނގާފައިވަނީ ދެކުނުގެ ރަށެއްގައި 2018 ވަނަ އަހަރުގެ ތެރޭގަ އެވެ.

މިކަން ހިނގި ރަށުގެ މެޖިސްޓްރޭޓް ކޯޓުން ވަނީ މައްސަލަ ކުރިއަށް ނުގެންދެވޭނެ ކަމަށް ކަނޑައަޅައި މައްސަލަ ބޭރުކޮށްލާފަ އެވެ.

ދަށު ކޯޓުން މައްސަލަ ބޭރުކޮށްލުމުން މައްސަލަ ހައިކޯޓުގައި އިސްތިއުނާފު ކުރީ ދައުލަތުންނެވެ.

މިމައްސަލައިގައި ހައިކޯޓުގެ ފަނޑިޔާރުންގެ އިއްތިފާގުން ހުކުމް ކުރީ މި މައްސަލައަކީ ފައިސަލާ ކުރަނިވި ހުކުމެއް ކުރަން ޖެހޭ މައްސަލައެއް ކަމަށެވެ. ހައިކޯޓުން މި މައްސަލަ ދަށު ކޯޓަށް އަލުން ފޮނުވާލީ، އެ ކޯޓުން މި މައްސަލަ ބަލައި ގޮތެއް ކަނޑައަޅަން ޖެހޭ ކަމަށް އަމުރުކޮށްފަ އެވެ.

ފުލުހުންގެ ތަފާސްހިސާބުތަކުން ދައްކާގޮތުން މި އަހަރުގެ މިހާތަނަށް ޖިންސީ ގޯނާގެ 268 މައްސަލަ އެ އިދާރާއަށް ރިޕޯޓްކޮށްފައިވެ އެވެ. ދެހާސް އަށާރަވަނަ އަހަރު މިފަދަ 367 މައްސަލައެއް ރިޕޯޓްކޮށްފައިވެ އެވެ.