މާދަމާއިން ފެށިގެން އާސަންދަ ލިބޭނީ ޕްރައިވެޓް އިންޝުއަރެންސް އޮތް ނަމަ، އެ އިންޝުއަރެންސްގެ ލިމިޓް ހަވަމުން ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބުނެފި އެވެ.

އެންސްޕާ އިން މިކަން އިއުލާން ކުރުމަށް ނެރުނު ބަޔާނެއްގައި ބުނީ ސިއްހީ ހިދުމަތްދޭ މަރުކަޒުތަކުން ހިދުމަތް ހޯދާ މީހުންގެ ތެރެއިން ޕްރައިވެޓް އިންޝުއަރެންސް އޮންނަ ފަރާތްތަކުން ހޯދާ ހިދުމަތްތަކަށް ބިލްކުރުމުގައި ޕްރައިވެޓް އިންޝުއަރެންސަށް އިސްކަންދިނުން ސަރުކާރުން ނިންމާފައިވާ ކަމަށެވެ.

ދިވެހިންނަށް ރަނގަޅު ފެންވަރުގެ އަސާސީ ސިއްހީ ހިދުމަތް ފޯރުކޮށްދިނުމަށް ހިންގާ އިޖުތިމާއީ ސިއްހީ އިންޝުއަރެންސްގެ ގައުމީ ނިޒާމަކީ ދެމެހެއްޓެނިވި ގޮތެއްގައި ފެންވަރު ރަނގަޅު ހިދުމަތެއް ފޯރުކޮށްދެވޭ ނިޒާމަކަށް ހެދުމަށް މަސައްކަތް ކުރަމުން އަންނަ ކަމަށްވެސް އެންސްޕާއިން ބުނެފައިވެ އެވެ.

އެންސްޕާ އިން ބުނި ގޮތުގައި ޕްރައިވެޓް އިންޝުއަރެންސް ނަގާފައިވާ ނަމަ، އެ ފަރާތްތަކަށް ދެން އާސަންދަ ލިބޭނީ އެ މީހުންގެ ފެކޭޖުގެ ލިމިޓް ހަމަވުމުންނެވެ.

މިކަން ކުރިއަށް ދަނީ ދިވެހި ރައްޔިތުންނަށް ލުއި ފަސޭހަ އަދި ދެފުށް ފެންނަ ފަދަ އުސޫލުތަކަކުން ކަށަވަރުކުރުމަށްޓަކައި މި ފިޔަވަޅު ތަންފީޒު ކުރުމަށް ހަމަޖެހިފައި ވަނީ އެކި ފިޔަވަޅުތަކަށް ބަހާލައިގެން އައުޓް ޕޭޝަންޓް އަދި އިން ޕޭޝަންޓްގެ ހިދުމަތްތައް ވަކިން ކަމަށްވެސް އެންސްޕާއިން ބުނެ އެވެ.

އެންސްޕާ އިން ބުނީ މާދަމާ އިން ފެށިގެން ސަރުކާރުގެ އަދި އަމިއްލަ ސިއްހީ ހިދުމަތްދޭ މަރުކަޒުތަކުން އައުޓް ޕޭޝަންޓްގެ ހިދުމަތްތައް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރެންސް އޮންނަ ފަރާތެއް ނަމަ، ޕްރައިވެޓް އިންޝުއަރެންސަށް ފުރަތަމަ ބިލް ކުރަން ނިންމާފައިވާ ކަމަށެވެ.

އެންސްޕާ އިން ވަނީ އާސަންދަ ސްކީމް މެދުވެރިކޮށް ހިދުމަތް ލިބިގަތުމަށް ފަހު، އެކަމުގެ ރަސީދު ހޯދުމަށް ވެސް އިލްތިމާސްކޮށްފަ އެވެ. އަދި ކަނޑައަޅާފައިވާ އުސޫލާ ހިލާފަށް ހިދުމަތްދޭ މަރުކަޒުތަކުން އަމަލުކުރާކަން ފާހަގަވެއްޖެ ނަމަ، އެކަން އާސަންދައިގެ ޗެޓްލައިން 7951400 އަށް ރިޕޯޓުކުރުމަށް ވަނީ އެދިފަ އެވެ.