ރައީސް މުއިއްޒުގެ ނަންފުޅު "ދޮގު ތަކުރުފާނު" ގެ ގޮތުގައި ފޮތްތަކުގައި ލިޔެވިދާނެ ކަމަށް ވައިކަރަދޫ ދާއިރާގެ މަޖިލިސް މެންބަރު ހުސެއިން ޒިޔާދު ވިދާޅުވެއްޖެ އެވެ.

ޒިޔާދު މިހެން ވިދާޅުވީ ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ސިޔާސީ ގާނޫނަށް އިސްލާހުގެންނަ ބިލަށް ވާހަކަދައްކަވަމުންނެވެ.

ސިޔާސީ ޕާޓީތަކުގެ ގާނޫނަށް ގެންނަން އިސްލާހުގައި ސިޔާސީ ޕާޓީތަކުގައި މެންބަރުންގެ އަދަދަށް ނުބަލާ 3000 ހަމަވެ ރަޖިސްޓްރީ ކުރާ ޕާޓީތަކަށް ފައިސާ ދިނުމުގެ މައްސަލައަށް ވާހަކަ ދައްކަވަމުން ޒިޔާދު ވިދާޅުވީ ދައުލަތުން ސިޔާސީ ޕާޓީތަކުގެ ދަފުތަރެއް ބަލަހައްޓަން ނުވެސް ޖެހޭނެ ކަމަށާއި، ސިޔާސީ ޕާޓީތައް ހިންގާނީ އެބަޔަކު އަމިއްލައަށް ކަމަށެވެ. ރަޖިސްޓްރީ ކުރާ ކޮންމެ ޕާޓީއަކަށް ދައުލަތުން ފައިސާ ދޭންޖެހޭނަމަ އެއްވެސް ކަމެއް ނުކުރާ ޕާޓީތަކަށްވެސް ފައިސާ ލިބޭނެ ކަމަށް އޭނާ ވިދާޅުވި އެވެ.

އެހެންކަމުން ސިޔާސީ ޕާޓީތަކުން ކުރަނީ ކޮންކަމެއްތޯ ބަލަން ޖެހޭކަމަށާއި މާޒީން ފެންނަގޮތުން ޕާޓީތަކުން ކުރާ ކަމަކީ ދޮގާއި މަކަރު ހަދައިގެން ވެރިކަމަށް އައުން ކަމަށް އޭނާ ވިދާޅުވި އެވެ.

އެގޮތުން މި ސަރުކާރުން ވެރިކަމަށް އައުމަށާއި އައުމަށްފަހު ހަދާފައިވާ ދޮގުތަކާއި ގުޅޭގޮތުން ޒިޔާދު ވާހަކަދެއްކެވި އެވެ.

"އާސަންދަ މިހާރު ނުލިބޭ. އާސަންދަ ކަނޑައެއް ނުލާ، އާސަންދަ ނުލިބޭ. މަސްވެރިންނަށް 20 ރުފިޔާއަށް ވުރެން މަތިން މަސް ކިލޯއެއް ނުކިރޭ. ޑޮލަރުގެ އަގު ހުރީ 19 އިން މަތީގައި، 50 ބިލިއަން ރުފިޔާގެ ބަޖެޓް ހުސްވީ މިއޮތް. ފްލެޓެއް ގޯއްޗެއް އަތުނުލާނެކަމަށް ވިދާޅުވި. ނަމަވެސް ކަންވީ އެގޮތަކަށް ނޫން" އޭނާ ވިދާޅުވި އެވެ.

އެހެންކަމުން ރައީސް މުއިއްޒު މިހާރު ދޮގު އެހައްދަވާ މިންވަރުން، ތާރީހުގައި އެމަނިކުފާނުގެ ނަންފުޅު ފޮތްތަކުގައި ބޮޑު ތަކުރުފާނުގެ ނަންފުޅުގޮތަށް ނުލިޔެވިދާނެކަމަށާއި ނަމަވެސް "ދޮގު ތަކުރުފާނު" ގެ ގޮތުގައި ލިޔެވިދާނެކަމަށް އޭނާ ވިދާޅުވި އެވެ.

"އަޅުގަނޑުވެސް ބޭނުމެއްނޫން އެހެންވާކަށް. އެހެންވެ މިދަންނަވަނީ ރައްޔިތުންގެ އިހުސާސްތައް ދަނެގެން ގައުމު މިއޮތް ހާލަތު ދަނެގެން، ރަނގަޅު ތެދުބަހުން އިހްލާސްތެރިކަމާއެކު މިގައުމުގެ ވެރިކަން ކޮށްދެއްވާށޭ. "ދިވެހިންގެރާއްޖެ" އަދި އޮތީ ދިވެހިންނަށް ވަރަށް ނާމާންކޮށް" ޒިޔާދު ވިދާޅުވި އެވެ.