އިޒްރޭލުން ފަލަސްތީނުގެ މުސްލިމުންނާ ދެކޮޅަށް ހިންގާ ލާއިންސާނީ ޖަރީމާތަކަށް އެހީތެރިވުމަށްފަހު ސުލްހައަށް ގޮވުމުގެ އެއްވެސް ހައްގެއް އެމެރިކާއަށް ލިބިގެންނުވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ސައުދީ އަރަބިއްޔާގެ ވެރިރަށް ރިޔާދުގައި މިއަދު ފެށި އެކްސްޓްރާއޯޑިނަރީ ޖޮއިންޓް އަރަބް-އިސްލާމިކް ސަމިޓްގައި ތަގްރީރު ކުރައްވަމުން ރައީސް މުއިއްޒު ވިދާޅުވީ ފަލަސްތީނު ރައްޔިތުންނާ ދެކޮޅަށް އިޒްރޭލުން ހަނގުރާމަކުރަނީ އެމެރިކާއިން ދޭ ހަތިޔާރުގެ ބޭނުންކޮށްގެން ކަމަށެވެ. އެހެންކަމުން ފަލަސްތީނާއި އިޒްލޭރުގެ މައްސަލަ ހައްލުކުރަން ސުލްހައަށް ގޮވުމުގެ ހައްގެއް އެމެރިކާއަށް ލިބިގެންނުވާ ކަމަށް އެމަނިކުފާނު ވިދާޅުވި އެވެ.

އިޒްރޭލުގެ ލާއިންސާނީ އަމަލުތައް އެކި ފަރާތްތަކުން ފާއިތުވި އަހަރުތަކުގައި ހަރުއަޑުން ކުށްވެރިކުރިޔަސް މިއަދާ ހަމައަށް ވެސް ފަލަސްތީނުގެ ރައްޔިތުން ތަހައްމަލް ކުރަމުން އައި ބިރުވެރިކަމަށް އެއްވެސް ބަދަލެއް ނާންނަ ކލަމަށް ރައީސް ވިދާޅުވި އެވެ.

ރައީސްގެ ވާހަކަފުޅުގައި ފާއިތުވީ އަހަރެއްހާ ދުވަހުގެ ތެރޭގައި އެކަނި ވެސް އިޒްރޭލްގެ ލާއިންސާނީ ހަމަލާތަކާ ގުޅިގެން ގާތްގަނޑަކަށް 50،000 އެއްހާ ފަލަސްތީނުގެ ރައްޔިތުން ޝަހީދުވެފައިވާކަން ފާހަގަކުރެއްވި އެވެ. ހަމައެހެންމެ ހާހުން ގުނާލެވޭ އަދަދުކުން ލުބުނާނުގެ ރައްޔިތުން ވެސް ޝަހީދުކޮށްލާފައިވާ ކަމަށް އެމަނިކުފާނު ވިދާޅުވި އެވެ.

"އެ އާއިލާތައް ބިކަވެ، ދަރިން ޔަތީމުވެ، އެމީހުންގެ މުސްތަގުބަލު ލޯ ކުރިމަތީގައި ނެތިގެން ހިނގައްޖެ،" ރައީސް ވިދާޅުވި އެވެ.

އެމަނިކުފާނު ވިދާޅުވީ އިޒްރޭލުން ހިންގާ ޖަރީމާތައް ހުއްޓުވުމަށް، ގަދަ ބާރުގައި ތިއްބެވި ބޭފުޅުން އެބޭފުޅުން އަޅަން ޖެހޭ ފިޔަވަޅުތައް އަޅާފައި ނުވާ ކަމަށެވެ.

"ބާރުގަދަ ގައުމުތަކުން، ވަކިން ހާއްސަކޮށް އެމެރިކާ އާއި އެގައުމުގެ ބައިވެރިންގެ އަމަލުތަކުން ދައްކުވައި ދެނީ ފަލަސްތީނުގެ ފުރާނައަކީ އެހެން އިންސާނުންގެ ފުރާނަހާ އަގުހުރި އެއްޗެއްކަން އެގައުމުތަކުން ގަބޫލުނުކުރާކަން،" ރައީސް ވިދާޅުވި އެވެ.