ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މަޖިލިސް މެންބަރު، ވިޔަފާރިވެރިޔާ ގާސިމް އިބްރާހިމްގެ ނަމުގައި ސްކޭމެއް ހިންގަމުންދާތީ ސަމާލުވުމަށް ގާސިމް އެދިވަޑައިގެންފި އެވެ.

ގާސިމް ޓީވީ ޗެނަލަކަށް ދެއްވި އިންޓަވިއުއެއް ބަދަލުކޮށްގެން އޭއައި މެދުވެރިކޮށް ހަދާފައިވާ ވީޑިއޯއެއް ދަނީ ސޯޝަލް މީޑިއާގައި ދައުރުކުރަމުންނެވެ. އިނގިރޭސި ބަހުން އަޑު އަޅާފައިވާ އެ ވީޑިއޯގައި ގާސިމް ކަމަށް ދައްކުވައިދޭން އުޅޭ މީހާ ބުނަނީ އޭނާގެ ފަސް ބިލިއަން ޑޮލަރު އެކަމުގައި އިންވެސްޓްކޮށްފައިވާ ކަމަށެވެ.

މިކަމާއި ގުޅިގެން ގާސިމް ހިއްސާކުރެއްވި ޕޯސްޓެއްގައި ވިދާޅުވީ އެއްވެސް ރައްޔިތަކު ސްކޭމްތަކުގައި ނުޖެހުމަށާއި މީސްމީޑިއާގައި މިހާރު ދައުރުވަމުން ދަނީ ފޭކް ވީޑިއޯތަކެއް ކަމަށެވެ.

"ޚާއްޞަކޮށް ޓިކްޓޮކް، އިންސްޓަރގްރާމް އަދި ފޭސްބުކްގައި އަޅުގަނޑުގެ ފޮޓޯއާއި، ވީޑިއޯ ބޭނުންކޮށްގެން، އާޓިފިޝަލް އިންޓެލިޖެންސްގެ އެހީގައި ތައްޔާރުކޮށް އެކިކަހަލަ އޮފްޝޯ ޓްރޭޑް ކުރުމަށާއި، އިންވެސްޓްކޮށް އަވަހަށް ނަފާ ލިބޭނެ ފަދަ މާލީ މުޢާމަލާތްތަކުގެ ދިވެހީންނަށް އަޅުގަނޑު ފުރުޞަތު ހޯދައިދޭކަމަށް ދައްކުވައިދީ، އަދި ރާއްޖޭގެ ޤައުމީ ބޭންކް މެދުވެރިވެ މި ސްކީމުގެ ފައިދާލިބޭނޭ ގޮތް ހަމަޖެހޭނޭމަށް ބަޔާންކޮށް، އަޅުގަނޑުގެ ނަމުގައި ފަތުރަމުންދާ އޯޑިއޯ ވީޑިއޯ ކްލިޕްތަކަކީ ރައްޔިތުންގެ ތެރެއިން ބަޔަކަށް އޮޅުވާލާ، ޒަމާނީ ކޮށް ސްކޭމް ކުރުމުގެ ބޭނުމުގައި ހިންގަމުންދާ އޮޅުވާލުމުގެ ދަށުދަރައިޖެ ޢަމަލުތަކެކެވެ." ޤާސިމް ވިދާޅުވެފައިވެ އެވެ.

މިފަދަ ބައެއް ވީޑިއޯ ތަކަކީ ހަގީގަތެއް ކަމަށް ހީކޮށް ބައެއް ފަރާތްތަކުން އެފަދަ ކްލިޕްތައް އެމަނިކުފާނާއި ހިއްސާ ކުރަމުން ގެންދާ ކަމަށާއި އެހެންކަމުން އެތަކެތީގެ އެއްވެސް އަސްލެއްނެތްކަން ކަށަވަރުކޮށްދެއްވާ ކަމަށްވެސް ގާސިމް ވިދާޅުވި އެވެ.