ތ. ކަނޑޫދޫގައި ވެރިކަންކުރާ ޕީއެންސީގެ އެތެރޭގެ އިންތިހާބުގައި ވާދަކުރި ދެ ކެންޑިޑޭޓަކު ހަމަނުޖެހުން ހިންގައި ވޯޓު ފޮށި ފަޅާލައިފި އެވެ.

ކަނޑޫދޫން ވާހަކަދެއްކި މީހަކު ބުނީ ވޯޓު ފޮށި ފަޅާލުމަށްފަހު އެއް ކެންޑިޑޭޓް އޭނާގެ ގެއަށް ބައެއް ވޯޓު ކަރުދާސްތައް ގެންގޮސްފައިވާ ކަމަށެވެ.

ސޯޝަލް މީޑިއާގައި އާންމުވެފައިވާ ވީޑިއޯއިން ފެންނަނީ އެ ރަށުގައި ބަހައްޓާފައި ހުރި ވޯޓު ފޮށްޓެއް ކައިރިއަށް މީހަކު ގޮސް ކައިރިވާން މަސައްކަތް ކުރުމުން އެ މީހާ އާއި އިތުރު މީހެއްގެ ދެމެދުގައި ހަމަނުޖެހުން ހިނގާ މަންޒަރެވެ.

މިއަދު 2:30 ހާއިރު އެ ހާދިސާ ހިނގީ ވޯޓާސް ލިސްޓް އޮޅުވާލާފައިވާ ކަމަށް ތުހުމަތުކޮށް ހިނގި ކަންތައްތަކަކަށްފަހު ކަމަށް އެރަށުން ވާހަކަދެއްކި މީހާ ކިޔައިދިނެވެ.

https://www.facebook.com/share/v/15h1tjXJdb/

ޕީއެންސީގެ މެމްބަރުންގެ އަދަދު 80،000 އަށް އަރާފައިވާ ކަމަށް އެ ޕާޓީން ބުންޏަސް މި އިންތިހާބުގައި ވޯޓުލުމުގެ ހައްގު ލިބިގެން ވަނީ 33،500 މީހުންނަށެވެ. މި އިންތިހާބުގައި 1984 މަގާމަކަށް މީހުން އައްޔަނު ކުރާނެ އެވެ. މާލެ އާއި އަތޮޅުތެރޭގެ 88 ރަށެއްގައި ވޯޓުލުން މިއަދު ކުރިއަށްދިޔަ އެވެ.

މި އިންތިހާބުގެ ނަތީޖާ އަދި އިއުލާނެއް ނުކުރެ އެވެ.