ސީ- ޓު- އެއާ ކާގޯގެ ގޮތުގައި ދުނިޔޭގެ 3 ގައުމަކުން ގެންނަ މުދާ މިހާރު ރާއްޖެއިން އެހެން ގައުމުތަކަށް އެކްސްޕޯޓްކުރާ ކަމަށް މޯލްޑިވްސް ސްޓޭޓް ޝިޕިން (އެމްއެސްއެސް) އިން ބުނެފި އެވެ.

ސީ-ޓު-އެއާ ކާގޯ ހިދުމަތަކީ ރާއްޖެއަށް ކަނޑުމަގުން ގެންނަ މުދާ ރައްކާތެރިކަމާއެކު ބޭނުންވާ މަންޒިލަށް ވައިގެ މަގުން އަވަހަށް ފޯރުކޮށްދިނުމަށް، އެމްޕީއެލް، އެމްއޭސީއެލް، ކަސްޓަމްސް އަދި އެމްއެސްއެސް ގުޅިގެން ފަށާފައިވާ ޚިދުމަތެކެވެ.

ޕީއެސްއެމްގެ "ރާއްޖެ މިއަދު" ޕްރޮގްރާމްގައި ވާހަކަދައްކަވަމުން އެމްއެސްއެސްގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވީ ސީ-ޓު-އެއާ ކާގޯގެ ޚިދުމަތަކީ ރާއްޖޭގެ އިގްތިސޯދު ފުޅާކުރުމުގައި ވަރަށް މުހިންމު ޚިދުމަތެއް ކަމަށެވެ. އަދި މިއީ އެހެން ގައުމުތަކުގައި ވެސް އިގްތިސޯދު ފުޅާކުރުމަށް ބޭނުންކުރާ ވަސީލަތެއް ކަމަށް އޭނާ ވިދާޅުވި އެވެ.

"ފުޅާކުރެވިއްޖިއްޔާ ވަރަށް މުހިންމު ކަމަކަށް ވާނެ ރާއްޖެއަށް އިތުރު ބޭރު ފައިސާ ވެއްދުމަށްޓަކައި. މިހާތަނަށް ވެސް ނަތީޖާއަށް ބަލާއިރު ވަރަށް ރަނގަޅު އިނގޭތޯ. އަޅުގަނޑުމެން ފުރަތަމަ ފެށީ ޓާކިޝް އެއާލައިންއާއި އެކީގައި. ހަމައެކަނި ބަނގްލަދޭޝްއިން އެއިރު ގެންނާނީ ވެސް. ފެށީމަ މިހާރު ރާއްޖެ އަންނަ އެގާރަ އެއާލައިންއަކުން މިކަން ކުރޭ. މިހާރު ބަންގްލަދޭޝްއިން އެކަންޏެއް ނޫން އަންނަނީކީ އިންޑިއާއިން ލަންކާއިން ވެސް އެބައާދޭ،" ޝަރީފް ވިދާޅުވި އެވެ.

ސީ-ޓު-އެއާ ކާގޯގެ ޚިދުމަތަކީ، ކަނޑުމަގުން އަންނަ މުދާ، ޓްރާންސިޓުކޮށް ވައިގެ މަގުން ދުނިޔޭގެ އެހެން ގައުމުތަކަށް ފޮނުވުމެވެ.