މިދިޔަ އަހަރާ އަަޅައިބަލާއިރު މިދިއަ ދެމަހު، އޮކްޓޫބަރު އަދި ނޮވެމްބަރު މަހު ޑެންގޫ ޖެހިގެން ރިޕޯޓު ކުރި މިންވަރު ދަށްވެފައި ވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފި އެވެ.

އެޗްޕީއޭއިން އާންމުކުރި ތަފާސްހިސާބުތަކުން ދައްކާގޮތުގައި ފާއިތުވި ދެ މަހު ޑެންގީ ޖެހިގެން ރިޕޯޓުކޮށްފައި ވަނީ، 266 ކޭހެވެ. އެއީ އޮކްޓޯބަރު މަހު 126 އަދި ނޮވެމްބަރު މަހު 140 ކޭހެވެ. ނަމަވެސް، މިދިޔަ އަހަރުގެ އޮކްޓޫބަރު އަދި ނޮވެމްބަރު މަހު ޖުމްލަ 524 ކޭސް ރިޕޯޓުކޮށްފައިވެ އެވެ.

ޑެންގޫގެ އަލާމާތްތައް ފެނިއްޖެ ނަމަ ގޭގައި ދެވިދާނެ ފަރުވާތައް އެޗްޕީއޭއިން ފާހަގަކޮށްފައިވާއިރު، އޭގެތެރޭގައި ގިނަގިނައިން އަރާމުކުރުމާއި ދިޔާއެއްޗެހި ބޭނުންކުރުމުގެ އިތުރުން ހުން މަޑުކުރުމާއި ގައިގައި ރިއްސުން މަޑުކުރުމަށް ޕެރެސެޓަމޯލް ބޭނުންކުރުން ހިމެނެ އެވެ.

އެޗްޕީއޭގެ ތަފާސްހިސާބުތަކުން ދައްކާފައިވާ ގޮތުގައި ޑެންގޫއާއެކު ބޭރަށް ހިންގުން ވެސް ފާއިތުވި ދެމަހު ވަނީ ދަށަށް ގޮސްފަ އެވެ. އެގޮތުން މިއަހަރުގެ އޮކްޓޫބަރު އަދި ނޮވެމްބަރުގައި ބޭރަށް ހިންގުމުގެ 6،799 ކޭސް ރިޕޯޓުކޮށްފައި ވާއިރު، މިދިޔަ އަހަރު ރިޕޯޓުކޮށްފައި ވަނީ، 14،831 ކޭހެވެ.

ޑެންގޫއާއި ބޭރަށްހިންގުން ޖެހުނު މިންވަރު މަދުވެފައި ވީނަމަވެސް، އަރިދަފުސް ރޯގާ ޖެހުނު މިންވަރު މިއަހަރު ވަނީ ބޮޑުތަނުން އިތުރުވެފަ އެވެ. އެގޮތުން ވޭތުވެދިޔަ ދެމަހު 70،019 މީހުންނަށް އަރިދަފުސް ރޯގާ ޖެހިގެން ރިޕޯޓުކޮށްފައި ވާއިރު، މިދިޔަ އަހަރުގެ އޮކްޓޯބަރު ނޮވެމްބަރުގައި އަރިދަފުސް ރޯގާ ޖެހިގެން ރިޕޯޓުކުރީ 65،634 މީހުންނެވެ.

އަރިދަފުސްރޯގާ ޖެހުނު މިންވަރު ވަރަށް ބޮޑަށް އިތުރުވެފައި ވުމުން އިންފްލުއެންޒާ އަދި ކޮވިޑްފަދަ ބަލިތަކުން ސަލާމަތްވުމަށް ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސްކޮށްފަ އެވެ.

އެޗްޕީއޭއިން ފާހަގަކޮށްފައިވާ ގޮތުގައި މި ބަލިން ރައްކާތެރިވުމަށް އެޅިދާނެ ފިޔަވަޅުތަކުގެ ތެރޭގައި ކެއްސާ ކިނބިހިއަޅާއިރު ނޭފަތާއި އަނގަމަތި ޓިޝޫއަކުން ނިވާކުރުމާއި ގިނަގިނައިން އަތް ދޮންނަން ސަމާލުކަން ދިނުމާއި އިންފުލުއެންޒާއިން ރައްކާތެރިވުމަށް ވެކްސިން ޖެހުމުގެ އިތުރުން ބަލިވެގެން ހޮސްޕިޓަލަށް ދާއިރު، ވީހާވެސް މަދު މީހުން ގޮވައިގެން ދިއު ހިމެނެ އެވެ.