ނިދީގައި ގުގުރިދެމުން އެއީ ވަރަށް ގިނަ ބަޔަކަށް ކުރިމަތިވާ ބޮޑު މައްސަލައެކެވެ.

އޭގެ ސަބަބާއި، އޭގެ އަސަރާއި، އޭގެ ފަރުވާއާ ބެހޭގޮތުން ވާހަކަދައްކާ ނަމަ ބުނަން ޖެހެނީގުގުރި ދެމުމަކީ ދުނިޔޭގެ އެތައް މިލިއަން ބަޔަކަށް ދިމާވާ އާންމު މައްސަލައެކެވެ. އެހެނީ އެއީ ނިދުމުގެ ތެރޭގައި ނޭވާލާއިރު އުފެދޭ ރެޓްލިން ނުވަތަ ވައިބްރޭޓިން އަޑެކެވެ. އެއީ ގެއްލުމެއް ނެތް ކަމެކޭ ހީވިޔަސް، ގުގުރި ދެމުމަކީ މީހެއްގެ ދިރިއުޅުމުގެ ފެންވަރަށް ބޮޑު އަސަރެއް ކޮށް، ނިދި މަދުވެ، ދުވާލު ވަގުތު ވަރުބަލިވުމާއި، އެކުގައި ނިދާ މީހަކަށް އުދަގޫތަކެއް މެދުވެރިވެ އެތައް މައްސަލައެއް ކުރިމަތިވާ ކަމެކެވެ.

ގުގުރި ދެމެން މެދުވެރިވާ ސަބަބުތަކާ ގުޅޭގޮތުން ސިއްހީ މާހިރުން ވިދާޅުވާ ގޮތުގައި ގުގުރި ދެމުމަށް މެދުވެރިވާ އެތައް ސަބަބުތަކެއް އެބަހުއްޓެވެ. އެންމެ އާންމު ކަންކަމުގެ ތެރޭގައި ނޭވާލާ ނިޒާމު ބެދޭގޮތްވުމާއި އަދި ގުގުރިދެމެން މެދުވެރިވާ އެންމެ އާންމު އެއް ސަބަބަކީ ނޭވާލާ ނިޒާމަށް ހުރަސްއެޅުމެވެ. މިއީ ނޭފަތް ބެދުން، ޓޮންސިލް ދުޅަވުން، ނުވަތަ ދޫ ތިރިއަށް ސޮހުން ނުވަތަ ކަސިޔާރުވުމުގެ ސަބަބުން ދިމާވާ ކަމެކެވެ.

ނޭވާލާ ނިޒާމުން ވައި ދައުރު ކުރަން އުނދަގޫވާ ވަގުތުތަކުގައި ވައިބްރޭޝަނެއް އުފެދި އޭގެ ސަބަބުން ގުގުރިދެމުގެ އަޑު އިވެން މެދުވެރިވެ އެވެ. އުމުރުން ދުވަސްވާވަރަކަށް އަހަރެމެންގެ މަސްތަކާއި ޓިޝޫތައް ގުދުރަތީ ގޮތުން ބަލިކަށިވެގެން ދާއިރު، އޭގެ ތެރޭގައި އަހަރެމެންގެ ކަރުތެރެއާއި ނޭވާލާ ނިޒާމުގައި ހުންނަ މަސްތަކާއި ޓިޝޫތައް ވެސް ބަލިކަށިވެގެންދެ އެވެ. މިކަމުގެ ސަބަބުން ނޭވާބެދުމުގެ ނުރައްކާ އިތުރުވެ އެވެ.

މާބޮޑަށް ބަރުދަން އިތުރުވުމުން ނުވަތަ ފަލަވުމުން ކަރުތެރެއާއި ނޭވާލާ ނިޒާމުގައި އިތުރު ސަރުބީ ޖަމާވެ، ވައި ދައުރުވުމަށް ދަތިވެ، ގުގުރިދެމުން ފަދަ ކަންކަން މެދުވެރިވެ އެވެ.

މީގެ އިތުރުން އުއްޑުން އޮވެ ނިދުމަކީ ދުލާއި، ކަރުތެރޭގެ މަސްތައް ތިރިއަށް ސޮހި، ގުގުރިދެމެން މެދުވެރިވާ ކަމެކެވެ. ނިދުމުގެ ކުރިން ބައެއްކަހަލަ ބުއިންތައް ނުވަތަ ބޭސްތައް ބޭނުންކުރުމަކީ ކަރުތެރެއާއި ނޭވާލާ ނިޒާމުގެ މަސްތަކުގެ ބާރު ދޫވެ ގުގުރިދެމުން ފަދަ ކަންކަން މެދުވެރިވާ ކަމެކެވެ.

ގުގުރި ދެމުމަކީ މީހެއްގެ ސިއްހަތާއި ދިރިއުޅުމުގެ ފެންވަރަށް ގިނަ ނޭދެވޭ އަސަރުތަކެއް ކޮށްފާނެ ކަމެކެވެ. އެންމެ އާންމުކޮށް ދިމާވާ ކަންކަމުގެ ތެރޭގައި ހިމެނެނީ ނިދުމުގެ ފެންވަރު ދަށްވުމެވެ. އެގޮތުން ގުގުރު ދެމުމަކީ ނިދި މެދުކެނޑި، ނިދުމުގެ ފެންވަރު ދަށްވެ، ދުވާލު ވަގުތު ވަރުބަލިކަން ކުރިމަތިވާ ކަމެކެވެ.

މީގެ އިތުރުން ގުގުރި ދެމުމަކީ ބައިވެރިޔާއަށް އުނދަގުލާއި މާޔޫސްކަން މެދުވެރި ކުރުވާ ކަމެކެވެ. އެއަޑު ގަދަ ނަމަ ބައިވެރިޔާއަކަށް ވެސް ހަމަ ނިންޖެއް ނުލިބެ އެވެ.

ދިގު މުއްދަތަކަށް ގުގުރި ދެމުމަކީ ލޭމައްޗަށް ދިއުން، ހިތުގެ ބަލި، އަދި ސްޓްރޯކް ފަދަ ސިއްހީ މައްސަލަތައް ކުރިމަތިވުމުގެ ފުރުސަތު އިތުރުކޮށްދޭ ކަމެކެވެ. އަދި ގުގުރި ދެމުމަކީ މީހެއްގެ ދިރިއުޅުމުގެ ފެންވަރަށް އަސަރުކޮށް، ރުޅިގަދަވުމާއި، މޫޑު ބަދަލުވުމާއި، ސަމާލުކަން ދޭން އުނދަގޫވުން ފަދަ ކަންކަން ކުރިމަތިވާ ކަމެކެވެ.

ގުގުރިދެމޭނަމަ ދިރިއުޅުމުގެ ވައްޓަފާޅިއަށް ބަދަލުތަކެއް ގެންނަން ޖެހެ އެވެ. ނުވަތަ ޑޮކްޓަރީ ފަރުވާތައް ހޯދަން ޖެހެ އެވެ. އެންމެ ފައިދާހުރި ބައެއް ފަރުވާތަކުގެ ތެރޭގައި ދިރިއުޅުމުގެ ވައްޓަފާޅިއަށް ގެންނަ ބަދަލުތައް ހިމެނެ އެވެ. އެގޮތުން ބަރުދަން ލުއިކުރުމާއި، ނިދުމުގެ ކުރިން ވަކިބާވަތެއްގެ ބުއިންތަކާއި ބޭސްތައް ބޭނުން ނުކުރުން އަދި އެއްއަރިއަކަށް އޮވެ ނިދުން ފަދަ އާދައިގެ ދިރިއުޅުމުގެ ބަދަލުތައް ގެނައުމަކީ ގުގުރިދެމުން ކުޑަކުރުމަށް އެހީތެރިވެދޭނެ ކަންކަމެވެ.