ހުޅުމާލެގައި ހަދާފައިވާ ވިނަރެސް ފްލެޓްތަކާއި ގުޅޭ ހިޔާނާތާއި ވައްކަމުގެ މައްސަލަ ފަޅާއެރުމުން ވިނަރެސްއާ ގުޅޭ ލިޔެކިޔުންތައް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ ވެބްސައިޓުން ޑިލީޓްކުރަން ފަށައިފި އެވެ.

ރައީސް މުހައްމަދު މުއިއްޒުގެ ސަރުކާރުން ވިނަރެސް ފްލެޓްތަކެއް ވެސް އެކި މީހުންގެ އަތުން ރިޝްވަތު ނަގައިގެން އިއުލާންކުރުމެއް ނެތި ވިއްކާފައިވާކަން ވަނީ ފަޅާއަރާފަ އެވެ. އެކި މީހުންގެ އަތުން ފައިސާ ނަގައިގެން އިއުލާންކުރުމެއް ނެތި 100 އަށް ވުރެ ގިނަ ވިނަރެސް ފްލެޓް ބަހާލާފައިވެ އެވެ.

ވިނަރެސްގެ ހުރިހާ ކެޓަގަރީއެއްގެ ދަށުން ފްލެޓުތައް ދޫކޮށް ނިންމިއިރު، ބާކީ 123 ފްލެޓެއް ހުރި ކަމަށް ރަސްމީކޮށް އެޗްޑީސީން ކުރިން ބުނެފައިވެ އެވެ. އެ ފްލެޓުތައް ވިއްކަން ނޮވެމްބަރު 5، 2023، ގައި އެ ކުންފުނިން ހުޅުވާލި އެވެ.

ފްލެޓް ގަންނަން ހުށަހަޅަން އެފަހަރު ޖެހުނީ އެޗްޑީސީގެ އޮންލައިން ޕޯޓަލް މެދުވެރިކޮށެވެ. ނަމަވެސް އެ ދުވަހު ޕޯޓަލްއަށް ދިމާވި ޓެކްނިކަލް މައްސަލައެއްގެ ސަބަބުން ޕޯޓަލް މެދުވެރިކޮށް ފޯމު ހުށަނޭޅުމުގެ ޝަކުވާ ބޮޑުވި އެވެ. އެއަށްފަހު ބަލަންޖެހޭ ކަންކަން ބެލުމަށް، ފްލެޓް ވިއްކުން އޭރު އެޗްޑީސީން މަޑުޖައްސައިލި އެވެ. އެއީ ކުރީގެ ސަރުކާރުންނެވެ.

އެއަށްފަހު ރައީސް މުއިއްޒުގެ ވެރިކަން ފެށުމުން އިބްރާހީމް ފަޒުލް ރަޝީދު މެނޭޖިން ޑިރެކްޓަރު ކަމާ ހަވާލުވެ އޭރު ހުށަހެޅި ފޯމްތައް ބާތިލްކުރި އެވެ. އެއަށްފަހު ރިޝްވަތު ނަގައިގެން ފްލެޓްތައް ވިއްކީ އެވެ.

ރައްޔިތުންގެ ބޯހިޔާވަހިކަމާއި ގުޅުންހުރި މިފަދަ ބޮޑެތި ހިޔާނާތްތައް ފަޅާއަރަންފެށުމާއެކު، ވިނަރެސް ފުލެޓުތަކާ ގުޅޭގޮތުން އެޗްޑީސީ ވެބްސައިޓުގައި ކުރިން އާންމުކުރި ތިން ލިޔުމެއް މިހާތަނަށް ވަނީ ޑިލީޓުކޮށްފަ އެވެ.

ޑިލީޓުކޮށްފައިވަނީ ވިނަރެސް މަޝްރޫއިން އެފާރޓްމަންޓް ގަތުމަށްއެދި ފޯމު ހުށަހެޅި ފަރާތްތަކުގެ މުރާޖާ ކޮށްފައިވާ ލިސްޓު، ވިނަރެސް މަޝްރޫއުއިން ފުލެޓު ގަތުމަށް ހުށަހަޅާފައިވާ ފަރާތްތަކުގެ ތެރެއިން ޔުނިޓް އިޙްތިޔާރުކުރުމުގެ މަރުޙަލާ ނުނިމޭ ފަރާތްތަކާއި ގުޅޭގޮތުން ކުރި އިއުލާނު އަދި ވިނަރެސް ހައުސިންގ މަޝްރޫއިން އެޕާޓްމަންޓް ގަތުމަށް އެދި ފޯމު ހުށަހެޅި ފަރާތްތަކުގެ ވަގުތީ ލިސްޓެވެ.

މި ލިސްޓުތަކާއި އިއުލާނުތަކަކީ މީގެކުރިން އެޗްޑީސީގެ ސައިޓުގައި އާންމުކޮށް، ޑައުންލޯޑުވެސް ކުރެވޭ ގޮތަށް ހުރި ލިޔުންތަކަކެވެ.

މިދިޔަ މަޖިލިސް އިންތިހާބުގެ ކެމްޕޭންގެ ތެރޭގައި އޭގެތެރެއިން ގިނަ އަދަދެއްގެ ފްލެޓް ރިޝްވަތު ނަގައިގެން ވިއްކާލި ކަމަށް "ހުރިހާ"އަށް މައުލޫމާތު ދިން މީހުން ކިޔައިދިނެވެ. ނުވިކި ހުރި ވިނަރެސް ފްލެޓްތައް ބޭނުންކޮށްގެން ވެސް ޕީއެންސީއަށް މަޖލިސް އިންތިހާބުގެ މެޖޯރިޓީ ލިބޭތޯ ބެލި އެވެ.

މީގެ އިތުރުން ސީލައިފް މައްސަލައާ ގުޅިގެން ދޫކުރަން ކޯޓުން އެނގި 206 ފްލެޓްގެ ބަދަލުގައި 226 ފްލެޓް ދޫކޮށްފައިވާކަންވެސް ވަނީ ހާމަވެފަ އެވެ. ސީލައިފްގެ މައްސަލައާ ގުޅިގެން ކަމަށް ބުނެ ނުހައްގުން ޖުމްލަ 20 މީހަކަށް ފްލެޓް ވިއްކާފައިވެ އެވެ.

ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތި ލިބުނުކަމަށް ނިންމާ އެޗްޑީސީން ގޯތި ދީފައިވާ މައްސަލަވެސް ވަނީ ފެންމަތިވެފަ އެވެ. އެކަމުގައި އެޗްޑީސީގެ އެމްޑީ ފަޒުލްގެ ބޭބެ މުހައްމަދު ފަޒީލްވެސް ހިމެނެ އެވެ.

ފުލުހުންނާއި އޭސީސީން ގޯތި މައްސަލަ ތަހުގީގު ކުރަމުންދިޔަނަމަވެސް ވިނަރެސް ފްލެޓުގެ މައްސަލަ ތަހުގީގު ނުކުރެ އެވެ.

އެޗްޑީސީގެ ވައްކަމާއި ކޮރަޕްޝަން މައްސަލަތަކުގެ މައުލޫމާތު އެ ކުންފުނީގެ ކުރީގެ ޗެއާމަން އަހުމަދު ޒުހޫރު ސިޓީއަކުން ރައީސް މުއިއްޒުގެ ސަމާލުކަމަށް ގެންނަވާފައި ވިޔަސް އެމަނިކުފާނު އެކަމަށް ދެއްވީ ބީރު ކަންފަތެކެވެ. މިދިޔަ ޖުލައި މަހު ޒުހޫރު ރައީސް މުއިއްޒަށް ފޮނުވި ސިޓީ މިހާރު ވަނީ އާންމުވެފަ އެވެ.

ޒުހޫރު އެމަނިކުފާނުގެ ސަމާލުކަމަށް ގެނައި މައްސަލަތައް ތަހުގީގުކުރަން ކަމާބެހޭ ފަރާތްތަކަށް ހުށަނޭޅީ ކީއްވޭތޯ ގިނަ ބަޔަކު ރައީސް މުއިއްޒާ ސުވާލު ކުރަމުންދެ އެވެ. ނަމަވެސް މިކަމާ ގުޅޭގޮތުން އެއްވެސް އެއްޗެއް އެމަނިކުފާނު ވިދާޅެއްނުވެ އެވެ.