ރައީސް މުހައްމަދު މުއިއްޒުގެ ސަރުކާރުން ހިންގި ގޯތީގެ ވައްކަމުގެ މައްސަލަ ތަހުގީގު ކުރާ ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ވެރިޔާ، ރަޖްނީ ޝުއައިބަށް ނުހައްގުން ވިނަރެސް ފްލެޓް ލިބުނުކަމަށް ބުނެ އާންމުކުރި މައުލޫމާތާއި ގުޅިގެން ބަލަންޖަހޭ ކަންކަން ބަލަން ފަށާފައިވާކަމަށް ފުލުހުން ބުނެފި އެވެ.

އެހެނިހެން ގޮތްގޮތުން ވިނަރެސް ފްލެޓް ދިން މީހުންގެ ލިސްޓް "ހަސަން ކުރުސީ"ގެ ނަމުގައި ހިންގާ އެކްސް އެކައުންޓުން ވަނީ ފަޅާއަރުވާލާފަ އެވެ. އެއީ ކޮރަޕްޝަންގެ ތެރެއިން ފްލެޓް ލިބުނު މީހުންނެވެ.

އޭގެތެރެގައި ރަޖްނީއާއި އޭނާގެ އަންހެނުންގެ ނަންވެސް ހިމެނެ އެވެ.

ހުޅުމާލެގައި ހަދާފައިވާ ވިނަރެސް ފްލެޓްތަކާއި ގުޅޭ ހިޔާނާތާއި ވައްކަމުގެ މައްސަލަ ފަޅާއެރުމުން ވިނަރެސްއާ ގުޅޭ ލިޔެކިޔުންތައް ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) ގެ ވެބްސައިޓުން މިހާރުވަނީ ޑިލީޓްކުރަން ފަށައިފަ އެވެ.

ރައީސް މުހައްމަދު މުއިއްޒުގެ ސަރުކާރުން ވިނަރެސް ފްލެޓްތަކެއް ވެސް އެކި މީހުންގެ އަތުން ރިޝްވަތު ނަގައިގެން އިއުލާންކުރުމެއް ނެތި ވިއްކާފައިވާކަން ވަނީ ހާމަވެފަ އެވެ. އެކި މީހުންގެ އަތުން ފައިސާ ނަގައިގެން އިއުލާންކުރުމެއް ނެތި 100 އަށް ވުރެ ގިނަ ވިނަރެސް ފްލެޓް ބަހާލާފައިވެ އެވެ.

މިދިޔަ މަޖިލިސް އިންތިހާބުގެ ކެމްޕޭންގެ ތެރޭގައި ސަރުކާރުން އޭގެތެރެއިން ގިނަ އަދަދެއްގެ ފްލެޓް ރިޝްވަތު ނަގައިގެން ވިއްކާލި ކަމަށް ވަނީ ތުހުމަތުތަކެއް ކޮށްފަ އެވެ.

މީގެ އިތުރުން ސީލައިފް މައްސަލައާ ގުޅިގެން ދޫކުރަން ކޯޓުން އެނގި 206 ފްލެޓްގެ ބަދަލުގައި 226 ފްލެޓް ދޫކޮށްފައިވާކަންވެސް ވަނީ ހާމަވެފަ އެވެ. ސީލައިފްގެ މައްސަލައާ ގުޅިގެން ކަމަށް ބުނެ ނުހައްގުން ޖުމްލަ 20 މީހަކަށް ފްލެޓް ވިއްކާފައިވެ އެވެ.

ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތި ލިބުނުކަމަށް ނިންމާ އެޗްޑީސީން ގޯތި ދީފައިވާ މައްސަލަވެސް ވަނީ ފެންމަތިވެފަ އެވެ. އެކަމުގައި އެޗްޑީސީގެ އެމްޑީ ފަޒުލްގެ ބޭބެ މުހައްމަދު ފަޒީލްވެސް ހިމެނެ އެވެ.

ރައްޔިތުންގެ ބޯހިޔާވަހިކަމާއި ގުޅުންހުރި މިފަދަ ބޮޑެތި ހިޔާނާތްތައް ފަޅާއަރަންފެށުމާއެކު، ފުލުހުންނާއި އޭސީސީން ގޯތި މައްސަލަ ތަހުގީގު ކުރަމުންދިޔަނަމަވެސް ވިނަރެސް ފްލެޓުގެ މައްސަލަ ތަހުގީގެއް ނުކުރެ އެވެ.