ވިނަރެސް ފްލެޓްތަކާ ގުޅޭގޮތުން އެޗްޑީސީގެ ވެބްސައިޓްގައި ހިމަނާފައިވާ ލިޔުންތައް ޑިލީޓްކުރަން ފަށައިފި އެވެ.

އިތުބާރުހުރި މަސްދަރަކުން "ހުރިހާ"އަށް އެނގިފައިވާގޮތުގައި އެ ލިޔުންތައް ޑިލީޓްކުރަނީ މިހާރު ސަސްޕެންޝަންގައި ހުރި އެޗްޑީސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދުގެ އެންގުމަށެވެ.

އެ ލިޔުންތައް ޑިލީޓްކުރަނީ އެކަމާ ގުޅޭގޮތުން ތަހުގީގެއް ކުރާނަމަ ހެކި ނުފެންނަ ގޮތް ހެދުމުގެ ގޮތުންނެވެ.

މިދިޔަ ސަރުކާރު ނިމުނުއިރު، ނުވިކިހުރި ފްލެޓްތައް ސިޔާސީގޮތުން މި ސަރުކާރުގައި ބާރުގަދަ މީހުން ހިމެނޭގޮތަށް އެކި މީހުންނަށް ވަނީ ނުގައްގުން ވިއްކާލާފަ އެވެ.

މިހާތަނަށް ތިން ލިޔުމެއް ޑިލީޓްކުރިކަން ވަނީ ފާހަގަވެފަ އެވެ. އެ ލިޔުންތަކުގެ ލިންކުތައް ހިމެނޭ ޕޯސްޓްތައް އެ ކުންފުނީގެ ސޯޝަލް މީޑިއާ އެކައުންޓްތަކުގައި އެބަހުއްޓެވެ. ނަމަވެސް ލިޔުންތައް ޑިލީޓްކޮށްލާފައިވާތީ އެ ލިންކުތަކަށް ނުވަދެވެ އެވެ.

މިހާތަނަށް ޑިލީޓްކޮށްފައިވާ ބައެއް ލިޔުންތައް

ފްލެޓަށް އެދުނު ފަރާތްތަކުގެ މުރާޖައާކުރެވިފައިވާ ލިސްޓު: މި ލިސްޓުގައި ފްލެޓް ލިބުނު ފަރާތްތަކުގެ ފުރިހަމަ މައުލޫމާތު ހިމެނެ އެވެ. މި ލިސްޓުން ޕޮއިންޓް ދިން ގޮތުގެ ތަފްސީލު ވެސް ފެންނަން ހުއްޓެވެ.

ޔުނިޓް އިޚްތިޔާރުކުރުމުގެ މަރުޙަލާއާ ގުޅޭ އިއުލާން: މި އިއުލާނުގައި ފްލެޓް ދޫކުރި ގޮތުގެ ޕްރޮސެސް ހިމެނެ އެވެ. އަދި ފްލެޓް ލިބުނު ފަރާތްތަކުގެ ޝަރުތުތައް ވެސް މި އިއުލާނުގައި ހިމެނެ އެވެ.

ފްލެޓަށް އެދުނު ފަރާތްތަކުގެ ވަގުތީ ލިސްޓު: މި ލިސްޓަކީ އެންމެ ފުރަތަމަ ނެރުނު ލިސްޓެވެ. ފަހުން ބަދަލުކުރެވުނު ނަންތައް މި ލިސްޓުން ދެނެގަނެވޭނެ އެވެ.

ވިރަނެސް މަޝްރޫއުގައި 13 ބުރީގެ ޖުމްލަ 10 ޓަވަރުހިމެނެ އެވެ. އެ ޓަވަރުތަކުގައި ޖުމްލަ 1،344 ފްލެޓު ހިމެނެ އެވެ. ވިނަރެސްގެ ފްލެޓްތައް މިދިޔަ ސަރުކާރުން ވިއްކާފައި ވަނީ އާންމުކޮށް އިއުލާންކޮށްގެން ކުރިމަތިލީ މީހުންނަށް މާކްސްދީގެންނެވެ. އެގޭއިތުރުން ދެން ވިނަރެސް ފްލެޓްތައް ދެނީ ގުޅިފަޅު މަޝްރޫއުގެ ފްލެޓް ގަތް ބައެއް ފަރާތްތަކަށާއި ސީލައިފް މަޝްރޫއުގެ ސަބަބުން ގެއްލުން ލިބުނު ބައެއް ފަރާތްތަކަށާއި ހިޔާ ފްލެޓް ދޫކޮށްލި ބައެއް ފަރާތްތަކަށެވެ.

އިއުލާންނުކޮށް ފްލެޓް ދޭން ހަމަޖެހިފައިވާ ބައިތަކުން ފްލެޓް ދިންއިރު، ގިނަ ބަޔަކަށް ނުހައްގުން ފްލެޓް ދިންކަން ވަނީ ފަޅާއަރައިފަ އެވެ.