ރައީސް ޑރ. މުހައްމަދު މުއިއްޒުގެ ސަރުކާރުން ވިނަރެސް ފްލެޓްތަކެއް ވެސް އެކި މީހުންގެ އަތުން ރިޝްވަތު ނަގައިގެން އިއުލާންކުރުމެއް ނެތި ވިއްކި ކަން ފަޅާއަރައިފި އެވެ.

މިކަން ފަޅާ އަރުވާލީ ހަސަން ކުރުސީގެ ނަމުގައި ހިންގާ އެކްސް އެކައުންޓުންނެވެ. މިކަމާ ގުޅޭ އިތުރު މައުލޫމާތު އެކި މަސްދަރުތަކުންް "ހުރިހާ"އަށް ވަނީ ލިބިފަ އެވެ.

"ހުރިހާ"އަށް ކަށަވަރުވެފައިވާ ގޮތުގައި އެކި މީހުންގެ އަތުން ފައިސާ ނަގައިގެން އިއުލާންކުރުމެއް ނެތި 100 އަށް ވުރެ ގިނަ ވިނަރެސް ފްލެޓް ބަހާލާފައިވެ އެވެ.

ވިނަރެސްގެ ހުރިހާ ކެޓަގަރީއެއްގެ ދަށުން ފްލެޓުތައް ދޫކޮށް ނިންމިއިރު، ބާކީ 123 ފްލެޓެއް ހުރި ކަމަށް ރަސްމީކޮށް އެޗްޑީސީން ކުރިން ބުނެފައިވެ އެވެ. އެ ފްލެޓުތައް ވިއްކަން ނޮވެމްބަރު 5، 2023، ގައި އެ ކުންފުނިން ހުޅުވާލި އެވެ.

ފްލެޓް ގަންނަން ހުށަހަޅަން އެފަހަރު ޖެހުނީ އެޗްޑީސީގެ އޮންލައިން ޕޯޓަލް މެދުވެރިކޮށެވެ. ނަމަވެސް އެ ދުވަހު ޕޯޓަލްއަށް ދިމާވި ޓެކްނިކަލް މައްސަލައެއްގެ ސަބަބުން ޕޯޓަލް މެދުވެރިކޮށް ފޯމު ހުށަނޭޅުމުގެ ޝަކުވާ ބޮޑުވި އެވެ. އެއަށްފަހު ބަލަންޖެހޭ ކަންކަން ބެލުމަށް، ފްލެޓް ވިއްކުން އޭރު އެޗްޑީސީން މަޑުޖައްސައިލި އެވެ. އެއީ ކުރީގެ ސަރުކާރުންނެވެ.

އެއަށްފަހު ރައީސް މުއިއްޒުގެ ވެރިކަން ފެށުމުން އިބްރާހީމް ފަޒުލް ރަޝީދު މެނޭޖިން ޑިރެކްޓަރު ކަމާ ހަވާލުވެ އޭރު ހުށަހެޅި ފޯމްތައް ބާތިލްކުރި އެވެ. އެއަށްފަހު ރިޝްވަތު ނަގައިގެން ފްލެޓްތައް ވިއްކީ އެވެ.

މިދިޔަ މަޖިލިސް އިންތިހާބުގެ ކެމްޕޭންގެ ތެރޭގައި އޭގެތެރެއިން ގިނަ އަދަދެއްގެ ފްލެޓް ރިޝްވަތު ނަގައިގެން ވިއްކާލި ކަމަށް ވެސް "ހުރިހާ"އަށް މައުލޫމާތު ދިން މީހުން ކިޔައިދިނެވެ. ނުވިކި ހުރި ވިނަރެސް ފްލެޓްތައް ބޭނުންކޮށްގެން ވެސް ޕީއެންސީއަށް މަޖލިސް އިންތިހާބުގެ މެޖޯރިޓީ ލިބޭތޯ ބެލި އެވެ.

"މި މައްސަލަ ރަނގަޅަށް ތަހުގީގުކޮށްފިއްޔާ އަޅުގަނޑު މި ދައްކާ ވާހަކަ އިތުރަށް ސާފުވާނެ. ގިނަ ފުލެޓްތައް ވިއްކި ގޮތަކީ ވެރިންނަށް ރިޝްވަތުގެ ގޮތުގައި 500،000 ރުފިޔާ. ބްރޯކަރަށް ރިޝްވަތުގެ ގޮތުގައި 100،000 ރުފިޔާ. އަދި އެޗްޑީސީއަށް 50،000ރ ގެ އުސޫލުން. މިއީ މިކަން ހިނގިގޮތަކީ. މި މައްސަލަ ބަލާކަށް ރައީސް މުއިއްޒަށް ކެރިވަޑައިގަންނާވެނެ ކަމަށް ނުބެލެވޭ. ސަބަބަކީ މިއީ ގިނަ މަޖިލިސް މެމްބަރުންނާ ވެސް ގުޅުންހުރި ކަމަކަށްވާތީ،" "ހުރިހާ"އާ ވާހަކަދެއްކި ސަރުކާރުގެ އޮފިޝަލަކު ވިދާޅުވި އެވެ.

އެޗްޑީސީގެ ވައްކަމާއި ކޮރަޕްޝަން މައްސަލަތަކުގެ މައުލޫމާތު އެ ކުންފުނީގެ ކުރީގެ ޗެއާމަން އަހުމަދު ޒުހޫރު ސިޓީއަކުން ރައީސް މުއިއްޒުގެ ސަމާލުކަމަށް ގެންނަވާފައި ވިޔަސް އެމަނިކުފާނު އެކަމަށް ދެއްްވީ ބީރު ކަންފަތެކެވެ. މިދިޔަ ޖުލައި މަހު ޒުހޫރު ރައީސް މުއިއްޒަށް ފޮނުވި ސިޓީ މިހާރު ވަނީ އާންމުވެފަ އެވެ.

ޒުހޫރު އެމަނިކުފާނުގެ ސަމާލުކަމަށް ގެނައި މައްސަލަތައް ތަހުގީގުކުރަން ކަމާބެހޭ ފަރާތްތަކަށް ހުށަނޭޅީ ކީއްވޭތޯ ގިނަ ބަޔަކު ރައީސް މުއިއްޒާ ސުވާލު ކުރަމުންދެ އެވެ. ނަމަވެސް މިކަމާ ގުޅޭގޮތުން އެއްވެސް އެއްޗެއް އެމަނިކުފާނު ވިދާޅެއްނުވެ އެވެ.

އޭގެބަދަލުގައި ވަޒީރުން އަންނަނީ އެމަނިކުފާނަކީ ކޮރަޕްޝަނާ ދެކޮޅު "ޗެމްޕިއަނެއް" ކަމަށް ރައްޔިތުންނަށް ދެއްކުމަށްޓަކައި ސޯޝަލް މީޑިއާ މެދުވެރިކޮށް ތައުރީފްގެ އެކި ބަސްތައް އެމަނިކުފާނަށް ރައްދު ކުރަމުންނެވެ.