ހައުސިން ޑިވޮލަޕްމަންޓް ކޯޕަރޭޝަން (އެޗްޓީޑީސީ)ން ވަގަށް ގޯތިތަކެއް ދިން މައްސަލައެއް ފެންމަތިވެ އެ މައްސަލަ ބަލަމުންދަނިކޮށް، އެ މައްސަލައާގުޅޭ ގޮތުން އެޗްޑީސީއާއި ފުލުހުންނާ މަޝްވަރާތަކެއް ކޮށްފި އެވެ.

ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ ކުރީގެ އެމްޑީ ފަޒުލް ރަޝީދުގެ ބޭބެ އަދި އެމްޑަބްލިޔުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދާއި އެހެން މީހަކު ހިމެނޭ މައްސަަލައެއް ފެންމަތިވިފަހުން ފަޒުލް މަގާމުން ސަސްޕެންޑްކޮށްފައިވަނިކޮށް ފަހުން ވަނީ އިސްތިއުފާ ދެއްވައިފަ އެވެ.

ފަޒުލްގެ އިސްތިއުފާއާ އެކު އެޗްޑީސީގެ އެމްޑީގެ މަގާމަށް މުހައްމަދު މައުރޫފް ޖަލީލް ވަނީ އައްޔަނުކޮށްފަ އެވެ.

ފުލުހުންނާއެކު މިއަދު ބޭއްވި ބައްދަލުވުމުގައި މައުރޫފް ބައިވެރިވެވަޑައިގަތް އިރު އެ ބައްދަލުވުމުގައި ޕޮލިސް ކޮމިޝަނަރު އަލީ ޝުޖާއު ވެސް ބައިވެރިވެވަޑައިގަތެވެ.

އެ ބައްދަލުވުމުގައި މިހާރު ކުރިއަށްދާ، ގެދޮރުވެރިޔާ އަދި ބިންވެރިޔާ ސްކީމާ ގުޅޭގޮތުން ހިނގަމުންދާ ތަހުގީގާ ބެހޭގޮތުން މަޝްވަރާ ކުރިކަމަށް ފުލުހުން ބުނެފައިވެ އެވެ.

ބިންވެރިޔާ ސްކީމުގެ މައްސަލަ ފުލުހުން ބަލަން ފަށާފައިވާާ އިރު ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.

އެ މައްސަލަގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެމަ އެކަން ތަހުގީގުކުރުމަށްފަހު ދައުވާކުރުމަށްޓަކައި ހުށަހެޅުމަށް ޕްރޮސިކިއުޓާ ޖެނެރަލް އައްބާސް ޝަރީފް ވަނީ އޭސީސީއަށް އަމުރުކޮށްފަ އެވެ.