މިއަހަރު ރާއްޖެއަށް ޒިޔާރަތްކުރާ ދެ މިލިއަން ވަނަ ފަތުރުވެރިޔާ އަންނަ ބުރާސްފަތި ދުވަހު ރާއްޖެ އަންނާނެކަމަށް ލަފާކުރައްވާ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.

ސަރުކާރުން މި މިއަހަރު ދެ މިލިއަން ފަތުރުވެރިން ގެނައުމަށް ވަނީ އަމާޒު ހިފައިފަ އެވެ.

ޕީއެސްއެމްއަށް ދެއްވި އިންޓަވިއުއެއްގައި ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވީ އާދީއްތަ ދުވަހުގެ ނިޔަލަށް ރާއްޖެއަށް 1.978،252 ފަތުރުވެރިން ޒިޔާރަތްކޮށްފައިވާ ކަމަށެވެ. އަދި ފަތުރުވެރިން އަންނަ އަދަދުތަކަށް ބަލާއިރު، ދެ މިލިޔަން ވަނަ ފަތުރުވެރިޔާ އަންނާނެ ކަމަށް ބެލެވެނީ އަންނަ ބުރާސްފަތި ދުވަހު ކަމަށް ވެސް މިނިސްޓަރު ވިދާޅުވި އެވެ.

ފައިސަލް ވިދާޅުވީ ދެ މިލިއަން ފަތުރުވެރިންގެ އަމާޒަށް ވާސިލުވާން ކައިރިވެފައިވާއިރު، މިއީ ރައީސް ޑރ. މުހައްމަދު މުއިއްޒުގެ އިރުޝާދާއި ލަފާގެ ދަށުން ޓޫރިޒަމް މިނިސްޓްރީއާއި ސިނާއަތުގައި މަސައްކަތް ކުރައްވާ ފަރާތްތަކުން ގުޅިގެން ކުރެވުނު ކާމިޔާބު މަސައްކަތްތަކެއްގެ ނަތީޖާ ކަމަށެވެ.

އެ މިނިސްޓްރީން އެންމެ ފަހުން އާންމުކުރި ތަފާސްހިސާބުތައް ދައްކާގޮތުން ޑިސެންބަރު މަހުގެ ފުރަތަމަ 17 ދުވަހުގެ ތެރޭގައި ރާއްޖެއަށް 103،560 ފަތުރުވެރިން ވަނީ ޒިޔާރަތްކޮށްފަ އެވެ. މި އަދަދަކީ މިދިޔަ އަހަރުގެ މި މުއްދަތާއި އަޅާ ބަލާއިރު 2.9 ޕަސެންޓް އިތުރު އަދަދެކެވެ. މިދިޔަ އަހަރުގެ ޑިސެންބަރުމަހުގެ ފުރަތަމަ 17 ދުވަސްތެރޭ ރާއްޖެއަށް އައިސްފައި ވަނީ 100،652 ފަތުރުވެރިންނެވެ.

މިނިސްޓްރީގެ ތަފާސްހިސާބުތައް ދައްކާގޮތުން އެވްރެޖްކޮށް ކޮންމެ ދުވަހަކު މިހާރު ރާއްޖެއަށް 6،092 ފަތުރުވެރިން އާދެ އެވެ. މިމަހުގެ ކުރީކޮޅު ރާއްޖެއަށް ކޮންމެ ދުވަހަކު އަންނަ ފަތުރުވެރިންގެ އަދަދުތައް ހުރީ 5،000 ގަ އެވެ.

ފަތުރުވެރިންގެ ޖުމްލަ އަދަދަށް ބަލާއިރު، އަހަރުގެ މިހާތަނަށް ވަނީ 1.9 މިލިޔަން ފަތުރުވެރިންނާއެކު ރެކޯޑް އަދަދަކަށް ފަތުރުވެރިން ޒިޔާރަތްކޮށްފަ އެވެ. މިއީ މިދިޔަ އަހަރުގެ މިހާތަނަށް ރާއްޖެއަށް އައިސްފައިވާ 1.7 މިލިޔަން ފަތުރުވެރިންނާ އަޅާ ބަލާއިރު 8.8 ޕަސެންޓް އިތުރު އަދަދެކެވެ.