ރާއްޖޭގައި ހިންގާ ބޮޑެތި ރިސޯޓްތަކަށް ޓެރަރިސްޓް ހަމަލާއެއް ދޭން އެމްޑީޕީގެ ލީޑާޝިޕުން ރާވާފައިވާ ކަމަށް ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ވިދާޅުވެއްޖެ އެވެ.

ވެރިކަންކުރާ ޕީއެންސީން ރޭ ބޭއްވި ޖަލްސާގައި ވާހަކަދައްކަވަމުން ނިހާދު ވިދާޅުވީ އެކަމުގައި އިސްކޮށް އުޅެނީ ދައުލަތުގެ މާލިއްޔާއިން އަށް ރުފިޔާއަށް ޕެނަޑޯލް ގުޅައެއް ވިއްކި މީހަކު ކަމަށެވެ. ނަމަވެސް އެއީ ކާކު ކަމެއް ނިހާދު ވިދާޅެއްނުވެ އެވެ.

އޭނާ ވިދާޅުވީ ރާއްޖޭގައި ހިންގާ ފައިވްސްޓާ ފެންވަރުގެ ރިސޯޓްތަކަށް އަމާޒުކޮށްގެން އެ ހަމަލާ ދޭން އުޅުމުގައި އެމްޑީޕީގެ ލީޑާޝިޕްގެ "ބްރޯ" ވެސް އެކަމުގައި ބައިވެރިވާ ކަމަށެވެ. އަދި އެ ކަމަކަކީ ރާއްޖޭގެ ފަތުރުވެރިކަން ހަވާލުކޮށްލުމަށް ހިންގާ ކަމެއް ކަމަށް ނިހާދު ވިދާޅުވި އެވެ.

އޭނާގެ އެ ވާހަކައާ ގުޅިގެން ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ. އެގޮތުން ވެލިދޫ ދާއިރާގެ މެމްބަރު މުހައްމަދު އައްބާސް އެކްސްގައި ވިދާޅުވީ އެފަދަ ދޮގު ވާހަކައެއް ދެއްކުމަކީ ރާއްޖޭގެ ފަތުރުވެރިކަމަށް ގެއްލުންވާނެ ކަމެއް ކަމަށެވެ.

އައްބާސް ވިދާޅުވީ ނިހާދު އެފަދައިން ވިދާޅުވުން އެއީ ކުޑަކަމެއް ނޫން ކަމަށާއި އޭނައާ މެދު ފިޔަވަޅު އަޅަންޖެހޭ ކަމަށެވެ.

ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރުކަން ވެސް ކުރިން ކުރައްވާފައިވާ ނިހާދު ފުލުހުންގެ އިދާރާއަށް ހާޒިރުކޮށް އެކަމާ ގުޅޭގޮތުން ސުވާލުކުރުމަށް ވެސް އެމްޑީޕީގެ އެކްޓިވިސްޓުން އަންނަނީ ސޯޝަލް މީޑިއާގައި ގޮވާލަމުންނެވެ.

އެމްޑީޕީގެ ޓިކެޓްގައި ފޭދޫ ދާއިރާއަށް އިންތިހާބުވި ނިހާދު ޕީއެންސީއަށް ސޮއިކުރީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތް ފަހުންނެވެ. އޭނާ އެ ޕާޓީއަށް ސޮއިކުރީ ރިޝްވަތުގެ ގޮތުގައި ފައިސާ ނަގައިގެން ކަމަށް ގިނަ ބަޔަކު ވަނީ ތުހުމަތުކޮށްފަ އެވެ.