އެމެރިކާގެ ލޮސް އެންޖެލެސްގައި ރޯވެފައިވާ އަލިފާންތަކުގައި މިހާތަނަށް އެތައް ހާސް ހެކްޓަރެއްގެ ބިން ވަނީ އަނދާ ހުލިވެފަ އެވެ. އެއާއެކު އެތައް ބައެއްގެ ގެދޮރު ގެއްލި ފުރާނަތަކެއް ވެސް ގެއްލިފައިވެ އެވެ.

އެހެން ނަމަވެސް މި ލިޔުމުގައި މި ބަލާލަނީ އެ ހާދިސާތަކުގެ ތެރެއިން ފެނުނު ވަރަށް ހައިރާން ކުރުވަނިވި މަންޒަރަކަށެވެ. އަލިފާންގަނޑުން މުޅި އަވަށް އަނދާ ހުލިވިއިރު އެއްވެސް ގެއްލުމެއް ނުވާ ގެއެއް ސޯޝަލް މީޑިއާގެ ސަމާލުކަމަށް ވަނީ އައިސްފަ އެވެ.

ވިޔަފާރިވެރިއެއް ކަމަށްވާ ޑޭވިޑް ސްޓެއިނާގެ ގެއަކީ އެންމެ ބޮޑަށް އަލިފާނުގެ އަސަރުކުރި މަލިބޫ ސަރަހައްދުގައި ހުންނަ ތިން ފަންގިފިލާގެ ގެ އެކެވެ.

އެގެއާ އިންވެގެން ހުރި އަވަށްޓެރިންގެ ގެތައް އަނދާ އަޅިއަށްވެ ބިމާ ހަމަވިއިރު ޑޭވިޑްގެ ގެއަށް މާބޮޑު ގެއްލުމެއް ނުލިބި ވަނީ ސަލާމަތްވެފަ އެވެ.

ޑޭވިޑް ބުނީ އޭނާގެ ގެ ހުރި ސަރަހައްދުގައި އަލިފާން ރޯވި ހަބަރު އިވުމުން އެހެން ގެ ތަކެކޭ އެއްގޮތަށް އޭނާގެ ގެ ވެސް ފަނާވާނެ ކަމަށް ހީކުރި ކަމަށާއި އެހެން ނަމަވެސް މުޅި ސަރަހައްދު އެއްކޮށް ހުލިވިއިރު އޭނާގެ ގެއަށް އެއްވެސް ގެއްލުމެއް ނުލިބި ހުރުމަކީ އަޖާއިބެއް ކަމަށެވެ.

ގަދަ އަލިފާނުން އެ ގެ ސަލާމަތް ވުމުގެ ސިއްރަކީ އެ ގެ އިމާރާތް ކުރުމުގައި ބޭނުންކޮށްފައިވާ ތަކެތި ކަމަށް ޑޭވިޑް ގަބޫލު ކުރެ އެވެ. އެ ގެ އިމާރާތް ކުރުމަށް ބޭނުން ކޮށްފައިވަނީ ސްޓުކޯއާއި ގަލެވެ.

ފަޔާޕްރޫފް ފުރާޅަކާއެކު އިމާރަތް ކޮށްފައިވާ އެ ގެއަކީ ބިންހެލުންތަކުގައި ވެސް މާ ބޮޑު ގެއްލުމެއް ނުލިބޭނެ ގޮތަށް އިމާރާތް ކޮށްފައިވާ ގެއެއް ކަމަށް ޑޭވިޑް ބުންޏެވެ.

ލޮސް އެންޖެލަސް އަލިފާނުގައި މިހާތަނަށް 10،000 އަށްވުރެ ގިނަ ގެތައް އަނދާ އަޅިއަށްވެފައިވާއިރު އެތައް ހާސް ބަޔަކު ވަނީ ހާލުގައި ޖެހިފަ އެވެ.