އިދިކޮޅު އެމްޑީޕީއަށް ނިސްބަތްވާ ވައިކަރަދޫ ދާއިރާގެ މަޖިލިސް މެންބަރު ހުސައިން ޒިޔާދު (ފިއްޓޭ) އަށް ނޭނގި ވެރިކަންކުރާ ޕީއެންސީއަށް ވައްދައިފި އެވެ.

ވަގު ފޯމް ހުށަހަޅައިގެން ގިނަ ބަޔަކު ޕީއެންސީއަށް ވައްދާފައިވާ ކަމުގެ ޝަކުވާ ބޮޑުވެފައިވާއިރު، މިއަދު އެމްޑީޕީން ބުނީ މެންބަރު ޒިޔާދުއަށް ނޭނގި ޕީއެންސީއަށް ވައްދާފައިވާ ކަމަށެވެ.

ޒިޔާދު އާއެކު ވައިކަރަދޫގެ ގިނަ ބަޔަކު ވެސް ޕީއެންސީއަށް ވައްދައިފައި އޮތްކަމަށް ފެންނަން އެބައޮތް ކަމަށާއި، އެއިން ގިނަ މީހުންނަކީ ވެސް އެމްޑީޕީގެ މަސައްކަތްތަކުގައި ވަރަށް ހަރަކާތްތެރި މީހުން ކަމަށް ފިއްޓޭ ވިދާޅުވި އެވެ.

ރައްޔިތުންގެ މަޖިލީހުގެ މެންބަރަކު އިންތިހާބުވި ސިޔާސީ ޕާޓީ ބަދަލުކޮށްފި ނަމަ ނުވަތަ އެ ޕާޓީން ވަކި ކޮށްފިނަމަ މަޖިލިހުގެ މެންބަރުކަމުން ވަކިވާ ގޮތަށް ގާނޫނުއަސާސީ އަށް ގެންސްފައިވާ އިސްލާހާއި އެކު ޒިޔާދުގެ ގޮނޑި ގެއްލިދާނެ ކަމާމެދު މިހާރު ވަނީ ސުވާލު އުފެދިފަ އެވެ.

ވަގު ފޯމެއް ފުރައި މެމްބަރު ހުސައިން ޒިޔާދު ޕީއެންސީއަށް ވެއްދުން ކުށްވެރިކޮށް އެކަން ސީރިއަސް މައްސަލައެއްގެ ގޮތުގައި ތަހުގީގު ކުރުމަށް އެމްޑީޕީން ވަނީ ގޮވާލާފައި އެވެ.

ޕީއެންސީގެ ވަގު ފޯމު މައްސަލަ ބޮޑުވެފައިވާއިރު، ވަގަށް ޕީއެންސީއަށް ވައްދާފައިވާ މީހެއްގެ ފޯމު ގއ. ވިލިނގިލި ދާއިރާގެ ކުރީގެ މެންބަރު، ސައުދު ހުސެއިން އެކްސްގައި ހިއްސާކޮށްފައިވެ އެވެ. އެ ފޯމުގައި ހެކިވެރިއެއްގެ ގޮތުގައި ސޮއިކޮށްފައި އޮތީ ވިލިމާލެ ދާއިރާގެ މިހާރުގެ މެންބަރު މުހައްމަދު އިސްމާއިލް އެވެ.

މީގެ އިތުރުން އާއްމުންގެ ތެރެއިން މީހަކު އެކްސްގައި ބުނެފައިވަނީ އޭނާ ޕީއެންސީއަށް ވަގަށް ވައްދާފައިވާއިރު ފޯމުގައި ޖަހާފައިވާ ފޮޓޯވެސް އިނީ އެޑިޓްކޮށް ތުނބުޅިއެއްވެސް ލާފައިކަމަށެވެ.

ވަގު ފޯމުތަކެއް ފުރައިގެން ޕީއެންސީއަށް މީހުން ވައްދާފައިވާ ކަމަށް ބުނާ މައްސަލައާ ގުޅިގެން ހުރި ކަންބޮޑުވުންތައް އިދިކޮޅު އެމްޑީޕީން ވަނީ މިދިޔަ ހަފުތާގައި އިލެކްޝަންސް ކޮމިޝަނާ ހިއްސާ ވެސް ކޮށްފަ އެވެ.