ލޮސް އެންޖެލެސްގައި ހިނގަމުންދާ އަލިފާނުގެ ހާދިސާތަކުގައި ލިބުނު ގެއްލުމުގެ އަގު 135 ބިލިއަން ޑޮލަރަށް ވުރެ ބޮޑުވާނެ ކަމަށް އަންދާޒާ ކޮށްފި އެވެ.

އެކިއު ވެދާގެ ފަރާތުން ހަދާފައިވާ އަންދާޒާއަކަށް ބަލާއިރު، މި އަލިފާނުގެ ހާދިސާތަކަކީ އެމެރިކާގެ ތާރީޚުގައި އެންމެ ބޮޑު ގެއްލުމެއްވި ހާދިސާތަކަށް ވުމީ އެކަށީގެންވާ ކަމެކެވެ.

ލަފާކުރެވޭ ގޮތުގައި ގެއްލުމުގެ އަގު 135 ބިލިއަން އާ 150 ބިލިއަން ޑޮލަރާ ދެމެދުގެ ޢަދަދަކަށް އަރާނެ އެވެ. އަދި އެ ގެއްލުން ލިބުނު ގެތަކަކީ އަގުބޮޑު ގެތަކަކަށް ވުމާއެކު، އިންޝުއަރެންސްގެ ގޮތުގައި 8 ބިލިއަން ޑޮލަރު (6.5 ބިލިއަން ޕައުންޑް) އަށްވުރެ ބޮޑު އަދަދެއް ދޭންޖެހޭނެ ކަމަށް ލަފާކުރެވެ އެވެ.

މި ހާދިސާގައި އަމިއްލަ ގެ އަނދައިގެން ދިޔަ މަޝްހޫރު މީހުންގެ ތެރޭގައި މެލް ގިބްސަން، ލެއިޓަން މީސްޓަ އަދި އެޑަމް ބްރޯޑީ އަދި ޕެރިސް ހިލްޓަން ހިމެނެ އެވެ.

އެ ސިޓީގެ ތާރީޚުގައި ހިނގަމުންދާ އަލިފާނުގެ އެންމެ ބޮޑު ހާދިސާގައި، އަނދައިގެން ގޮސްފައިވާ ސަރަޙައްދުތަކުގައި މަރުވެފައިވާ މީހުންގެ އަދަދު 16 އަށް ވަނީ އަރާފަ އެވެ. އަދިވެސް އިތުރަށް މަރުވި މީހުން ހޯދުމަށްޓަކައި ކުއްތާތަކާއި މީހުން ހޯދާ ޓީމުތަކުން ދަނީ މަސައްކަތް ފަށައިފަ އެވެ.

އެމެރިކާގެ ކަރަންޓު ކެނޑުމުގެ ހާދިސާތަކުގެ މައުލޫމާތު ބަލަހައްޓާ ވެބްސައިޓެއް ކަމުގައިވާ ޕަވައައުޓޭޖް ޔޫއެސްގެ މައުލޫމާތުން ދައްކާގޮތުގައި، ގާތްގަނޑަކަށް 35,000 ގެ އާއި ވިޔަފާރިތަކުން ވަނީ ކަރަންޓު ކެނޑިފަ އެވެ.

ގެތަކަށް ވަދެ، ވައްކަންކުރަން އުޅުނު 20 އަށް ވުރެ ގިނަ މީހުން ހައްޔަރުކޮށްފައިވާކަން ފުލުހުން ކަށަވަރުކޮށްދީފައިވެ އެވެ.

އެންމެ ބޮޑު އަލިފާނުގެ ހާދިސާ ހިނގަމުންދާ ޕެލިސޭޑްސް ގައި މިހާރު ވަނީ 20,000 އޭކަރަށް ވުރެ ބޮޑުބައި އަނދާފަ އެވެ. އަލިފާނާ ހަނގުރާމަ ކުރަމުންދާ ފަޔާ ފައިޓަރުން ބުނަނީ އަލިފާން ކޮންޓްރޯލްކުރުމުގައި ކުޑަ ކުރިއެރުމެއް ލިބިފައިވާ ކަމަށެވެ.

އަލިފާން މިހާރު އިރުމަތިން ފެތުރެމުންދާއިރު، ދުނިޔޭގެ ނަން މަޝްހޫރު އާޓް މިއުޒިއަމެއް ކަމަށްވާ ގެޓީ ސެންޓަރު ހުރި، މުއްސަނދިން ދިރިއުޅޭ ބްރެންޓްވުޑް ސަރަޙައްދަށް ދަނީ ނުރައްކާވަމުންނެވެ. އެގޮތުން މިއުޒިއަމްގެ މީހުން ވަނީ އެހެން ތަނަކަށް ބަދަލުކޮށްފަ އެވެ.

ކައިރީގައި ހުރި ޔުނިވަސިޓީ އޮފް ކެލިފޯނިއާގެ ކްލާސްތައް ކުރިއަށްދަނީ އޮންލައިންކޮށްނެވެ. އީޓަން އަލިފާނުގެ ހާދިސާގައި 11 މީހުން މަރުވެފައިވާކަން ވަނީ ކަށަވަރުކުރެވިފަ އެވެ. އަދި ޕެލިސޭޑްސްގެ އަލިފާނުގެ ހާދިސާގައި އިތުރު ފަސް މީހުން މަރުވެފައިވެ އެވެ.

ހޮނިހިރު ދުވަހާ ހަމައަށް، ލޯކަލް އޮތޯރިޓީތަކުގެ މައުލޫމާތުން ދައްކާގޮތުގައި، ލޮސްއެންޖެލެސް ކައުންޓީގައި 153,000 އަށްވުރެ ގިނަ މީހުން ވަނީ ގެދޮރު ދޫކޮށް ދިއުމަށް އަންގާފަ އެވެ. އަދި އިތުރު 166,000 މީހުންނަށް ވަނީ ގެދޮރު ދޫކޮށް ދިއުމަށް އިންޒާރުކޮށްފަ އެވެ.

އަލިފާނުގެ ހާދިސާތަކުގައި 12,000 އަށްވުރެ ގިނަ ތަންތަން ވަނީ އަނދައިގެން ގޮސްފަ އެވެ. އަނދާފައިވާ ތަންތަން ކަމަށް ބުނެފައި އެވަނީ ގެތަކާއި، އިތުރު އިމާރާތްތަކާއި، ގުދަންތަކާއި، މޯބައިލް ހޯމްތަކާއި އަދި އުޅަނދުތައް ހިމަނައިގެންނެވެ. އީޓަންގެ އަލިފާނުގެ ހާދިސާގައި 7,000 އަށްވުރެ ގިނަ ތަންތަން ވަނީ އަނދާ ހުލިވެފަ އެވެ.

ލޮސް އެންޖެލީސްގައި ރޯވެ އަނދަމުން ދާ މި އަލިފާންގަނޑު އަދިވެސް ކޮންޓްރޯލް ނުވާކަމަށް ރިޕޯޓުތައް ބުނެ އެވެ. ނަމަވެސް ބައެއް ރިޕޯޓުތައް ބުނާގޮތުން އަލިފާން އިތުރަށް ފެތުރުން ވަނީ ކޮންމެވެސް ވަރަކަށް ކޮންޓްރޯލް ވެފަ އެވެ.