ރާއްޖޭގައި ހިންދޫ ދީނުގެ ހަރަކާތްތަކެއް ހިންގަން އުޅުނު އިންޑިއާ ބަޔަކު އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.

މާސްޓާ ދުރްގާ ރާއޯ ގުރޫޖީގެ ނަމުގައި "ރޫހާނީ ފަރުވާ" ދޭ ސެޝަންތަކެއް ރާއްޖޭގައި ހިންގުމަށް އިސްތިހާރުކުރަމުންދާތީ އެ މައްސަލަ ބަލާމުންދާ ކަމަށް ފުލުހުން ވަނީ މީގެ ކުރިން ބުނެފަ އެވެ.

އިމިގްރޭޝަނުން ބުނީ ފުލުހުންނާ ގުޅިގެން ހިންގި އޮޕަރޭޝަނެއްގައި ފާލުބެލުމުގެ ކަންކަން ކުރަމުންދިޔަ އިންޑިއާއަށް ނިސްބަތްވާ ތިން ފިރިހެނުން އިއްޔެ ހައްޔަރުކޮށްފައިވާ ކަމަށެވެ. އެ ތިން މީހުންނަކީ ދަނަންޖޭ ބައިލަޕަތީ، 18 އަހަރު، ނަގަރާޖާ ބައިލްޕަތީ، 39 އަހަރު އަދި ސުރީހަރީ ވަނަމް، 25 އަހަރު ކަމަށް އިމިގްރޭޝަނުން ބުންޏެވެ.

އެ ތިން މީހުން ޑީޕޯޓު ކުރުމުގެ މަސައްކަތް އިމިގްރޭޝަނުން މިހާރު އަންނަނީ ކުރަމުންނެވެ.

އެ މީހުން ފާލު ބެލުމުގެ މަސައްކަތް ފީ ނަގައިގެން ހުޅުމާލެގައި ކުރަމުން ދިޔަ ކަމަށް "ދައުރު" ނޫހުން ވަނީ ރިޕޯޓްކޮށްފަ އެވެ.

މި މައްސަލައާ ގުޅިގެން ފުލުހުން ބުނީ ދިވެހިންގެ ސަގާފަތާއި ދީނާ ޚިލާފު މިފަދަ ކަންކަމުގެ މަޢުލޫމާތު އެކަކު އަނެއްކަކާ ހިއްސާ ކުރުމުގެ ބަދަލުގައި ވީ އެންމެ އަވަހަކަށް ކަމާބެހޭ އިދާރާތަކުގެ ސަމާލުކަމަށް ގެނެސް ޤާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދިއުމަކީ މުހިންމު ކަމެއް ކަމުގައި އެ އިދާރާއިން ދެކޭކަމަށެވެ.

މި މައްސަލައާ ގުޅިގެން، ޤާނޫނީ ގޮތުން އަޅަންޖެހޭ ފިޔަވަޅުތައް އެޅުމަށްޓަކައި ކުރަންޖެހޭ މަސައްކަތް ކަމާބެހޭ އިދާރާތަކާ ގުޅިގެން ދަނީ ކުރަމުން ކަމަށް ފުލުހުން އިއްޔެ ވަނީ ބުނެފަ އެވެ.