މިދިޔަ އަހަރުގެ އޮކްޓޯބަރު މަހު ރާއްޖެ އައުމަށްފަހު އާއިލާއަށް ޚަބަރެއްވެފައި ނުވާތީ އުމުރުން 30 އަހަރުގެ ޗައިނާ އަންހެނަކު ހޯދަން ދިވެހި ފުލުހުންގެ ޚިދުމަތުން ފަށައިފި އެވެ.

ގެއްލިގެން ހޯދަމުން ދަނީ ޗައިނާ ރައްޔިތެއް ކަމަށްވާ ސޫ ޒިއޯނިން (30އ) އެވެ.

ސޫ ޒިއޯނިން ރާއްޖެ އައިފަހުން އާއިލާއަށް ޚަބަރެއް ވެފައި ނުވާތީ، ވީނުވީއެއް ނޭނގި ގެއްލިގެން އާއިލާގެ ފަރާތުން ދިވެހިރާއްޖޭގައި ހުންނަ ޗައިނާ އެމްބަސީ މެދުވެރިކޮށް ފުލުހުންނަށް މައްސަލަ ހުށަހަޅާފައިވަނީ މިދިޔަ ހޮނިހިރު ދުވަހު އެވެ.

ގެއްލިގެން ހޯދަމުން އަންނަ ޗައިނާގެ ފަތުރުވެރިއާގެ ފޮޓޯއަކާ އެކު ފުލުހުންގެ ވެބްސައިޓުގައި މިއަދު ޝާއިއުކުރި ލިޔުމުގައި ބުނީ ގެއްލިފައިވާ ކަމަށް ރިޕޯޓުކުރުމާ ގުޅިގެން އެ އަންހެން މީހާ ހޯދުމުގެ މަސައްކަތް ފަށާފައިވާ ކަމަށެވެ.

ފުލުހުން ބުނީ މި މައްސަލަ ފުލުހުންނަށް ރިޕޯޓުކުރުމާ އެކު އޭނާ ހޯދުމަށް ފުލުހުންގެ ކަމާ ގުޅުންހުރި އެންމެހާ ބަހާތަކަށް މައުލޫމާތު ހިއްސާކުރެވި، ހޯދުމުގެ މަސައްކަތް ދަނީ ކުރަމުން ކަމަށެވެ.

ސޫ ޒިއޯނިން ޓުއަރިސްޓް ވިސާގައި ރާއްޖެ އައިސްފައި ވަނީ މިިދިޔަ އޮކްޓޫބަރު މަހުގެ 13 ވަނަ ދުވަހު ކަމަށް އެނގިފައިވާ ކަމަށް ފުލުހުން ބުންޏެވެ. އަދި އޭނާ މާލޭގައި ހުރި ގެސްޓް ހައުސްއިން އޮކްޓޫބަރު 24 ވަނަ ދުވަހު ހެނދުނުގެ ވަގުތެއްގައި ޗެކްއައުޓް ވެފައިވާ ކަމަށެވެ.

ފުލުހުން ބުނީ ޗެކްއައުޓް ވުމަށްފަހު އޭނާ ރާއްޖެއިން ފުރައިގެން ގޮސްފައިނުވާކަން ތަހުގީގަށް މައުލޫމާތު ލިބިފައިވާ ކަމަށެވެ. ނަމަވެސް ސޫ ޒިއޯނިން ހޯދުމަށް މިހާތާނަށް ކުރެވުނު މަސައްކަތުން އޭނާ އާ ބެހޭ އެއްވެސް މައުލޫމާތެއް އަދި އުޅޭތަނެއް ހޯދިފައި ނުވާ ކަމަށެވެ.

އެހެންކަމުން، ސޫ ޒިއޯނިންއާ ބެހޭ އެއްވެސް މައުލޫމާތެއް ލިބިފައިވާނަމަށް ލަސްނުކުރައްވައި ސީރިއަސް އެންޑް އޮގަނައިޒް ކްރައިމް އިންވެސްޓިގޭޝަންގެ ޑިއުޓީ ނަންބަރު 9911099އަށް ގުޅައި މައުލޫމާތު ހިއްސާކުރުމަށް ފުލުހުން ވަނީ އެދިފަ އެވެ.