ސޯޝަލްމީޑިއާގައި ގިނަ ބައެއްގެ މަގުބޫލުކަން ހޯދާފައިވާ (ކުރު ވީޑިއޯ އެޕްލިކޭޝަން) ޓިކްޓޮކް ގަތުމަށް އެމެޒޯން އިން ބިޑް ހުށަހަޅާފައިވާ ކަމަށް އިނގިރޭސި ނޫސްތަކުން ރިޕޯޓުކޮށްފި އެވެ.

އެމެޒޯންއިން ޓިކްޓޮކް ގަތުމަށް ބިޑެއް ހުށަހެޅި ނަމަވެސް، މި މަޝްވަރާތަކުގައި ބައިވެރިވެފައިވާ އެއްވެސް ފަރާތަކުން، އެމެޒޯންގެ ބިޑަށް ސަމާލުކަން ދޭ ކަމަށް ނުފެންނަ ކަމަށް ނިއުޔޯކް ޓައިމްސްއިން ބުނެ އެވެ. މި ބިޑް ހުށަހަޅާފައި ވަނީ ނައިބު ރައީސް ޖޭޑީ ވާންސް އަދި ވިޔަފާރި ވަޒީރު ހަވާޑް ލުޓްނިކްއަށް އެޑްރެސްކޮށް ފޮނުވި ސިޓީއަކުންނެވެ.

ނަމަވެސް، ވައިޓް ހައުސްގެ އޮފިޝަލެއް މިދިޔަ އަންގާރަ ދުވަހު ރޮއިޓާޒްއަށް މައުލޫމާތު ދީފައިވާ ގޮތުގައި، އެޕްރީލް 5 ގެ ސުންގަޑީގެ ކުރިން ޓިކްޓޮކްއާ ގުޅޭ ގޮތުން ހުށަހެޅޭ އެންމެ ފަހުގެ ހުށަހެޅުމަކާމެދު އެމެރިކާގެ ރައީސް ޑޮނާލްޑް ޓްރަމްޕް ވިސްނާވަޑައިގަންނަވާނެ އެވެ.

އެމެރިކާގެ ގާތްގަނޑަކަށް ދެބައިކުޅަ އެއްބައި މީހުން ބޭނުންކުރާ މި އެޕްގެ މުސްތަގުބަލު ވަނީ ނާމާން ކަމެއްގަ އެވެ. މިއީ 2024 ވަނަ އަހަރު ފާސްކުރި ގާނޫނަކާ ގުޅިގެންނެވެ. އެގޮތުން، އޯގަސްޓް 6 ވަނަ ދުވަހު، ޓްރަމްޕް ސޮއިކުރެއްވީ ބައިޓްޑާންސްއިން އެ ޕްލެޓްފޯމް ނުވިއްކައިފިނަމަ 45 ދުވަހުގެ ތެރޭގައި އެ ޕްލެޓްފޯމް އެމެރިކާގައި މަނާކުރުމަށް އަމުރުކުރައްވާ ރައީސްގެ އަމުރެއްގަ އެވެ.

ޓްރަމްޕް، ދެވަނަ ދައުރަކަށް ޖެނުއަރީ 20 ގައި ރައީސްކަމާ ހވާލުވުމަށްފަހު، މި ގާނޫނު ތަންފީޒުކުރުން 75 ދުވަހަށް ފަސްކުރުމަށް އެދި ވަގުތީ އަމުރެއް ސޮއިކުރެއްވި އެވެ. އޭގެ ފަހުން، އެކި ފަރާތްތަކުން ޓިކްޓޮކް ގަތުމަށް ޝައުގުވެރިކަން ފާޅުކޮށްފައިވާ ކަމަށް ރިޕޯޓުކުރެވިފައިވެ އެވެ.