ބޭންކް އޮފް މޯލްޑިވްސް (ބީއެމްއެލް)އިން 153 މިލިއަން ރުފިޔާއަށް ހުޅުމާލެއިން ބިމެއް ގަނެފި އެވެ.

މިދިޔަ ބުދަ ދުވަހު ސިވިލް ކޯޓުން ކުރި ހުކުމްގައިވާ ގޮތުން، ހުޅުމާލެ ލޮޓް ނަންބަރު 11824ގައިވާ 28،507 އަކަފޫޓުގެ އަމިއްލަ ބިން، ޖީއެސްޓީއާ އެކު 153.9 މިލިއަން ރުފިޔާގެ އަގަށް އެޗްޑީސީން ބީއެމްއެލްއަށް ވަނީ ވިއްކާފަ އެވެ.

ހުކުމްގައި ބުނީ، އެ އަދަދަށްވާ ފައިސާ ބީއެމްއެލްއިން ވަނީ އެޗްޑީސިއަށް ދައްކައި ހަލާސްކޮށްފަ އެވެ. އަދި މި މުއާމަލާތުގައި ފުރިހަމަވާން ޖެހޭ އެންމެހާ ކަންކަން ފުރިހަަމަވާ ކަމަށް ވެސް އެ ހުކުމްގައި ކަނޑައަޅާފައިވެ އެވެ.

މީގެ އިތުރުން މިދިޔަ ހަފުތާގައި ބޭންކުން ވަނީ ކޯޓު މެދުވެރިކޮށް، ހުޅުމާލޭ ފޭސް ދެއަކުން 15،000 އަކަފޫޓުގެ ބިމެއް ލާޖައްސައި ބަދަލުކޮށްފައެވެ. ހުޅުމާލޭ ފޭސް ދޭއްގެ ބިމުގެ އިތުރުން ލާ ޖައްސައި ބަދަލުކޮށްފައިވަނީ އެޗްޑީސީގެ ނަމުގައި ފޭސް އެކެއްގައި އޮތް ބިމެކެވެ. މި މައްސަލަ ވެސް ކޯޓުން ނިންމާފައިވަނީ ގާޒީ އަޒްފާއެވެ. ދެ މައްސަލަވެސް ނިންމީ މިދިޔަ ބުދަ ދުވަހެވެ.

ބީއެމްއެލްއިން 153 މިލިއަން ރުފިޔާއަށް ހުޅުމާލޭން ބިމެއް ގަނެފައިވާއިރު، މަރުކަޒީ ބޭންކް އެމްއެމްއޭއިން ވެސް ވަނީ މި ފަހުން ހުޅުމާލޭން ބިމެއް ގަނެފައެވެ. މިދިޔަ އަހަރު އެމްއެމްއޭއިން ހުޅުމާލެއިން ގަތީ، ގާތްގަނޑަކަށް 211 މިލިއަން ރުފިޔާއަށް 43،401 އަކަފޫޓުގެ ބިމެކެވެ.

އެމްއެމްއޭއިން ގަތް ބިން އޮންނަނީ ހުޅުމާލޭ ފޭސް އެކެއްގައި ހުންނަ ސެންޓްރަލް ޕާކުގެ ހުޅަނގަށް ވާގޮތަށް، ކޭ ޕާކު ފްލެޓުތަކާ ޖެހިގެންނެވެ.